Դիրիժոր Ռոբերտ Մլքեյանը ժպիտը դեմքին՝ ստացած վարդերի փունջը դրեց սեղանին և բեմ հրավիրեց Քույր Արուսյանկին:
– Եթե Հայաստանում Քույր Արուսյակի նման տասը մարդ լիներ, մենք կապրեինք այլ Հայաստանում,- դիմելով հանդիսատեսին հայտարարեց դիրիժորը, ապա վարդերի փունջը մեկնեց նրան:
Քույր Արուսյակը Տիրամայր Հայաստանի Պողոսյան կրթահամալիրի պատասխանատուն է: Գյումրիում գտնվող այս կրթահամալիրում սովորում են ծնողազուրկ, լքված, անապահով ընտանիքների երեխաներ:
Քույր Արուսյակը վարդերը բաժանեց Տիրամայր Հայաստանի երգչախմբի աղջիկներին, որոնց արհեստավարժ կատարումը ոգևորել էր ու անակնկալի բերել հանդիսատեսին: Այս երգչախմբի աղջիկները ծնողազուրկ և կամ անապահով ընտանիքների զավակներ են: Այս աղջիկների մայրը Քույր Արուսյակն է: Այս երգչախմբին ու այս աղջիկներին ոտքի են կանգնեցրել Ալեքքո և Անի Պէզիքեան ամուսինները:
Երգչախումբը տասը տարեկան է: Այս ընթացքում համերգներ է ունեցել Հայաստանի տարբեր բեմերում, շրջագայել Ֆրանսիայում, Շվեյցարիայում, Բելգիայում, Լիբանանում, Իտալիայում և Ֆրանսիայում: Վատիկանում մասնակցել է Հռոմի Պապի ապրիլի 12-ին մատուցած Սուրբ Պատարագին՝ Հայոց Ցեղասպանության 100-ամյա տարելիցին նվիրված միջոցառումների շրջանակներում:
Հունիսի 13-ի երեկոյան, Կոմիտասի անվան կամերային երաժշտության տանը կայացած Տիրամայր Հայաստանի երգչախմբի համերգը (գեղարվեստական ղեկավար և դիրիժոր Ռոբերտ Մլքեյան)՝ ի պատիվ բարերարներ Ալեքքո և Անի Պէզիքեանների էր:
Համերգի ծրագրում հնչեցին Կոմիտաս, Սայաթ Նովա, Բրամս, Շուբերտ և այլ նշանավորների կատարումներ: Չընդմիջվող ծափահարություններով և «բրավո»-ներով համերգն ավարտվեց Ռոբերտ Ամիրխանյանի «Երազ իմ երկիր Հայրենի» անմահ կատարումով:
Ալեքքո և Անի Պէզիքեանների բարեսիրական գործունեությունը տասնամյակներ ի վեր տարածվում է Հայաստանում և Սփյուռքում: Նրանք Մեծի Տանն Կիլիկիո կաթողիկոսության խոշոր նվիրատուներից են: Սպիտակի երկրաշարժն ու հայ մարդու նկատմամբ հոգատարության ներքին մղումը նրանց բերեց Հայաստան: Ապա Հայաստանը անկախացավ, և Պէզիքեանները իրենց բարեգործությունը շարունակեցին արդեն անկախ Հայրենիքում: Հայ առաքելական եկեղեցու հետևորդներ Պէզիքեան ամուսինները ստացել են կաթոլիկ կրթություն և ի երախտագիտություն, նրանց բարեգործությունը Հայաստանում ուղղվում է նաև հայ կաթոլիկ հաստատություններին:
Հունիսի 13-ին, Թբիլիսյան խճուղի 19 հասցեում տեղի ունեցավ “Անի Պէզիքեան” երիտասարդական նորակառույց կենտրոնի բացումը, որի շինարարությունը առատաձեռն նվիրատվությամբ հոգացել են Պէզիքեան ամուսինները:
Այս կենտրոնը, որպես կացարան, ծառայելու է Գյումրիի Պողոսյան կրթահամալիրի սաներին, ովքեր սովորում են մայրաքաղաքի տարբեր համալսարաններում, ինչպես նաև՝ Գյումրիի կարիքավոր ընտանիքների աղջիկներին, ովքեր ընդունվել են տարբեր համալսարաններ, և որոնց ծնողները ի վիճակի չեն հոգալու նրանց կեցության ծախսերը:
«Այս կենտրոնում պետք է բնակվեն այն ուսանողները, որոնք նյութական դժվարությունների մեջ են, նրանք, ովքեր ծնողազուրկ են և հասել են համալսարան հաճախելու տարիքին»,- ասում է Ալեքքո Պէզիքեանը:
Այս կենտրոնը կացարան և տանիք է դառնալու այն ուսանողների համար, որոնք կցուցաբերեն գերազանց առաջադիմություն:
«Մենք անցյալից ունենք Սպիտակի երկրաշարժի ծնողազուրկ երեխաների փորձառությունը: 350 երեխաներից մենք զատել էինք 42-ին, որպեսզի նրանք հաճախեն համալսարան: Բավական դժվարություններով, մենք հոգացինք նրանց համալսարանի ծախսերը՝ բնակարան, սնունդ: Այն ժամանակվանից գաղափար հղացավ, որ պետք է ունենաք կենտրոն, որը օջախ կդառնա մարզերից Երևանում ուսանող անապահով, ծնողազուրկ աղջիկների համար: Այս ծրագիրը նախատեսել ենք 40 աղջիկների համար: Հուսամ, որ մի օր էլ նրանք ծառայեն ուրիշների հաջողության համար»,- ասում է Ալեքքո Պէզիքեանը:
Բացման արարողությանը մասնակցելու էին եկել Հայաստանում Միացյալ Նահանագների և Լիբանանի դեսպանները, Հայաստանի Սփյուռքի նախարարը, հայ առաքելական և կաթոլիկ եկեղեցու հոգևոր հայրեր, բազմաթիվ հյուրեր:
Բացման խոսք ասաց Քույր Արուսյակը: Կարմիր ժապավենը կտրելու պատիվը տրվեց Տէր եւ Տիկին Ալեքքո և Անի Պէզիքեաններին ու նրանց Անի թոռնուհուն, Ռաֆայել Արքեպիսկոպոս Մինասյանին և Մարեկ Արքեպիսկոպոս Սոլչինսկուն: Ապա կատարվեց խորանի օծում: Շնորհակալության խոսք ասաց Ալեքքո Պէզիքեանը:
Ներկայումս կենտրոնում ապրում է հինգ սան, որոնց միանալու են ևս 17 աղջիկներ: Կենտրոնի նպատակը ոչ միայն ծնողազուրկ և անապահով ընտանիքների աղջիկներին կացարանով ապահովելն է, այլև նրանց սովորեցնել կյանքի հմտություներ, որպեսզի նրանք դառնան ինքանբավ քաղաքացիներ, ասում է Քույր Արուսյակը:
Սփյուռքի նախարար Հրանուշ Հակոբյանը “Անի Պէզիքեան” երիտասարդական կենտրոնի հիմնադրումը համարեց «Սփյուռք-Հայրենիք կապի փայլուն օրինակ»:
“Անի Պէզիքեան” երիտասարդական կենտրոնի բացման արարողության ընթացքում Ալեքքո Պէզիքեանը ներկաներին հրավիրեց Լիբանան, որտեղ գալիք հուլիսի 18-19-ին տեղի կունենա Հայոց ցեղասպանության որբերի թանգարանի, իսկ Բիքֆայայում՝ Նահատակների հրապարակի բացումը:
«Այդ օրերին կկայանա նաև Մյուռոնօրհնեք և զանազան այլ ծրագրեր: Հպարտությամբ կարող եմ ասել, որ այդ ծրագրերին մենք բերել ենք մեր մասնակցությունը»,- ասաց Ալեքքո Պէզիքեանը:
Թաթուլ Հակոբյան
