Կատարում շարունակվող ֆուտբոլի աշխարհի առաջնության H խմբի առաջին տուրի երկրորդ խաղում Պորտուգալիան մրցեց Գանայի հետ ու հաղթեց 3-2 հաշվով:
Հաշվի մեջ առաջինն առաջ անցան պորտուգալացիները: Երկրորդ խաղակեսում 11-մետրանոցն անվրեպ իրացրեց Կրիշտիանու Ռոնալդուն, որը խփեց իր 8-րդ գնդակն աշխարհի առաջնություններում և խփած գոլերի քանակով շրջանցեց արգենտինացի Դիեգո Մարադոնային և բրազիլացի Ռիվալդոյին (ԱԱ-ում խփած գոլերի թվով ռեկորդակիրը գերմանացի Միրոսլավ Կլոզեն է՝ 16 գոլ):
Քիչ անց Գանան կատարական «Ալ Սադի» հարձակվող Անդրե Այուի հավասարեցրեց հաշիվը, սակայն պորտուգալացիները պատասխանեցին ևս երկու գոլով: Աչքի ընկան Մադրիդի «Աթլետիկոյի» հարձակվող Ժոաու Ֆելիշն ու իտալական «Միլանի» հարձակվող Ռաֆայել Լեաուն:
Խաղավերջում Գանան կրճատեց հաշվի տարբերությունը, սակայն ավելին անել չհաջողվեց: Թիմի երկրորդ գնդակը խփեց սերբական «Ցրվենա Զվեզդայի» հարձակվող Օսման Բուկարին:
Ռոնալդուն սահմանեց աշխարհի առաջնության ռեկորդ` դառնալով պատմության առաջին ֆուտբոլիստը, որը գոլ է խփում 5 աշխարհի առաջնություններում: ԱԱ-2006-ում, ԱԱ-2010-ում, ԱԱ-2014-ում հարձակվողը խփել է մեկ գոլ, իսկ ԱԱ-2018-ում՝ 4:
Կրիշտիանու Ռոնալդուն սահմանեց նաև եվրոպական ռեկորդ: Պորտուգալիայի հավաքականի ավագը, Գանայի դեմ խաղում ընդգրկվելով մեկնարկային կազմում, պաշտոնապես մասնակցեց 10-րդ միջազգային մրցաշարին: Պատմության մեջ ոչ մի եվրոպացի նման ցուցանիշ չի գրանցել:
Վերջին 18 տարիներին «Ոսկե գնդակի» հնգակի դափնեկիրը մասնակցել է Եվրո-2004-ին, ԱԱ-2006-ին, Եվրո-2008-ին, ԱԱ-2010-ին, Եվրո-2012-ին, ԱԱ-2014-ին, Եվրո-2016-ին, ԱԱ-2018-ին ու Եվրո-2020-ին:
Կատարում կայանալիք աշխարհի առաջնությունը 5-րդն է Ռոնալդուի համար: Նման ցուցանիշ գրանցել են ընդամենը 4 ֆուտբոլիստներ՝ Անտոնիո Կարբախալը, Ռաֆայել Մարկեսը (երկուսն էլ Մեքսիկա), Լոտար Մատեուսը (Գերմանիա) և Լիոնել Մեսին (Արգենտինա):
Թիմերի մեկնարկային կազմերը.
Պորտուգալիա. Դիոգու Կոշտա, Ռուբեն Դիաշ, Ժոաու Կանսելու, Դանիլո Պերեյրա, Ռաֆայել Գերեյրո, Ռուբեն Նևեշ, Բերնարդու Սիլվա, Բրունո Ֆերնանդեշ, Օտավիո, Ժոաու Ֆելիշ, Կրիշտիանու Ռոնալդու:
Գանա. Լոուրենս Ատի-Զիգի, Աբդուլ-Ռահման Բաբա, Մոհամեդ Սալիսու, Դանիել Ամարտի, Ալեքսանդր Ջիկու, Ալիդու Սեիդու, Անդրե Այու, Սալիս Աբդուլ Սամեդ, Թոմաս Պարտի, Մոհամեդ Կուդուս, Ինակի Ուիլյամս:
Աղբյուրը՝ https://www.vnews.am/
