Շատվան գյուղը գտնվում է Վարդենիսից 8 կմ հարավ-արևելք, մարզկենտրոն Գավառից 83 կմ, մայրաքաղաք Երևանից 176 կմ հեռավորության, ծովի մակարդակից մոտ 2000 մետր բարձրության վրա:
Հայաստանի եւ հարակից շրջանների տեղանունների բառարան-ում (հեղինակներ՝ Թ.Խ. Հակոբյան, Ստ.Տ. Մելիք-Բախշյան, Հ.Խ. Բարսեղյան, Երեւանի Համալսարանի հրատարակչություն, Երևան, 1991թ) ասվում է, որ գյուղում պահպանվել են 15-16-րդ դարերի հայկական գերեզմաններ՝ խաչքարերով, ինչպես նաև եկեղեցու ավերակներ:
Մինչև 1988 թվականը բնակեցված է եղել ադրբեջանցիներով: Այժմ գյուղում ապրում են Ադրբեջանից բռնագաղթած և Հայաստանի տարբեր շրջաններից եկած հայեր: Բնակիչները զբաղվում են անասնապահությամբ և հողագործությամբ: Գյուղում գործում է դպրոց և բուժկետ:
2001 թվականի մարդահամարի տվյալներով՝ Շատվանում առկա բնակչության թիվը կազմել է 533, մշտական բնակչության թիվը՝ 577 հոգի:
Նախկինում ունեցել է Նարիմանլու, Հուսեյնղուլի Աղալու, Աղամալի, Սոյունկուլու Աղալը անունները: Նարիմանլուից Շատվանի է վերանվանվել 1991 թվականի ապրիլի 3-ին:
Հայ նշանավոր վիճակագիր Զավեն Կորկոտյանի “Խորհրդային Հայաստանի բնակչությունը վերջին հարյուրամյակում (1831-1931)” աշխատության համաձայն, Շատվանի բնակչությունը ըստ տարիների եղել է հետևյալը.
1831 թվական – չի նշվում,
1873 թվական – 636 հոգի, բոլորը՝ թաթար,
1886 թվական – 760 հոգի, բոլորը՝ թաթար,
1897 թվական – 877 հոգի (համառուսական՝ ցարական մարդահամար), բոլորը՝ իսլամ,
1908 թվական – 778 հոգի,
1914 թվական – 1207 հոգի, ըստ Կովկասյան օրացույցի,
1914 թվական – 813 հոգի, ըստ արխիվային տվյալների,
1916 թվական – 1079 հոգի,
1919 թվական – չի նշվում,
1922 թվական – 527 հոգի, բոլորը՝ թրքո-թաթար,
1926 թվական – 609 հոգի (ԽՍՀՄ առաջին մարդահամար), որից 605-ը՝ թուրք, 4-ը՝ քյուրդ,
1931 թվական – 719 հոգի, բոլորը՝ թուրքական խումբ:
ԽՍՀՄ մարդահամարի տվյալներով՝ Շատվանն ունեցել է.
1939 թվական – 873 հոգի,
1959 թվական – 976 հոգի,
1970 թվական – 1577 հոգի,
1979 թվական – 1855 հոգի:
Վարդենիսի շրջանը ձևավորվել է 1930թ սեպտեմբերի 9-ին 1151 քառակուսի կիլոմետրի վրա: Ունեցել է 1 քաղաքատիպ ավան՝ Վարդենիսը, և 14 գյուղական խորհուրդներ: Բնակավայրերի ընդհանուր թիվը եղել է 39:
1971թ մայիսի տվյալներով՝ Վարդենիսի շրջանի բնակչությունը եղել է 48700 հոգի, որից 8300-ը՝ քաղաքային, 40400-ը՝ գյուղական:
Պատրաստեց Թաթուլ Հակոբյանը
Լուսանկարը՝ Թաթուլ Հակոբյանի
Կարդալ և դիտել նաև՝
