Շրվենանց գյուղը Սյունիքի մարզի Կապանի շրջանի գյուղերից է, խոշորացված Կապան համայնքի մաս է կազմում:
Շրվենանցը գտնվում է մարզկենտրոն Կապանից 20 կմ հեռավորության, ծովի մակարդակից շուրջ 1100 մետր բարձրության վրա, Խոտանան գետի ձախափնյա լեռնալանջին: Ըստ Սյունիքի մարզպետարանի տվյալների՝ այսօր գյուղն ունի 69 բնակիչ:
Ըստ Ստեփանոս Օրբելյանի՝ Շրվենանցը ընդգրկված էր Տաթևի վանքի հաշվացուցակում և համարվում էր Սյունիքի մարզի հին բնակավայրերից։ Անվան ծագումը, ըստ ավանդության, կապված է Սյունյաց Շրվեն մելիքի հետ։
Շրվենանցի տարածքում կան գերեզմանոցներ (9-19դդ.), եկեղեցիներ (9-11դդ.)։
Շրվենանցը գտնվում էր Նորաշենիկի գյուղխորհրդի կազմում, տարանջատվել է
1991թ.՝ կազմավորելով ինքնուրույն վարչական միավոր, ապա մաս կազմել խոշորացված Կապանի համայնքի։
Գյուղում կա եկեղեցի (1899թ.), մոտ 2 կմ արևելք՝ Չորեքդռնի ավերակ վանք, 1 կմ
հյուսիս-արևելք՝ գերեզմանատներ, խաչքարեր։
Շրվենանցի բնակչությունը (աղբյուրը՝ Զավեն Կորկոտյան, “Խորհրդային Հայաստանի բնակչությունը վերջին հարյուրամյակում (1831-1931)”, ըստ տարիների, եղել է հետևյալը.
1831 թվական – 53 հոգի, բոլորը՝ հայ,
1873 թվական – 96 հոգի, բոլորը՝ հայ,
1886 թվական – 236 հոգի, բոլորը՝ հայ,
1897 թվական – 260 հոգի (համառուսական՝ ցարական մարդահամար), բոլորը՝ հայ,
1904 թվական – 300 հոգի,
1914 թվական – 301 հոգի, բոլորը՝ հայ, ըստ Կովկասյան օրացույցի,
1919 թվական – 220 հոգի,
1922 թվական – 265 հոգի, բոլորը՝ հայ,
1926 թվական – 216 հոգի (ԽՍՀՄ առաջին մարդահամար), որից 213-ը հայ, 3-ը՝ պարսիկ,
1931 թվական – 204 հոգի, բոլորը՝ հայ:
Խորհրդային մարդահամարի տվյալներով Շրվենանցն ունեցել է.
1939 թվական – 250 հոգի,
1959 թվական – 177 հոգի,
1970 թվական – 139 հոգի:
Տեքստը՝ Թաթուլ Հակոբյանի
Լուսանկարում՝ Շրվենանց գյուղի դպրոցը՝ կառուցված 1901թ, լուսանկարը՝ Հայկ Բարսեղյանի
Կարդալ և դիտել նաև՝
Կարդալ նաև՝
