Հայկական ուսումնասիրութիւններու «Անի» կեդրոնը 26 յունուարին «Նոյեան տապան» լրատուական գործակալութեան սրահին մէջ ներկայացուց «Ազդակ» օրաթերթի բացառիկ հատորը: Լրագրող, «Անի» կեդրոնի փորձագէտ Թաթուլ Յակոբեան նշեց, որ տարիներէ ի վեր «Ազդակ» բացառիկի հատորները կը ներկայացուին Երեւանի մէջ: Ան ընդգծեց, որ այս բացառիկները հայագիտական կարեւոր հատորներ են` շեշտելով, որ տարիներ ետք այս հատորները շատ մեծ արժէք պիտի ունենան իբրեւ աղբիւր եւ օրուան դէպքերու արտացոլացում հանդիսացող շտեմարան:
Նախ խօսք առաւ ազգագրագէտ Յարութիւն Մարութեան, որ դիտել տուաւ, թէ «Ազդակ»-ի բացառիկները կը հանդիսանան հայագիտական, հասարակական-քաղաքական, մշակութային, հրապարակախօսական տարեգիրք-պարբերական: Անոր համաձայն, միշտ կ՛անդրադառնանք ցեղասպանութեան յուշերուն եւ 100-ամեակին, սակայն հարց կայ այդ ամէնը երիտասարդ սերունդին փոխանցելու` նշելով, որ «Ազդակ» այդ առաքելութիւնը իրականացնողներէն մէկն է:
Ան դիտել տուաւ, որ «Ազդակ»-ը կարեւոր հեղինակներու եւ յօդուածագիրներու` Հայաստանէն եւ սփիւռքէն, գրութիւնները, ուսումնասիրութիւնները, յօդուածները կը համախմբէ եւ մատչելի կը դարձնէ հանրութեան:
«Ազդակ»-ի տնօրէն եւ գլխաւոր խմբագիր Շահան Գանտահարեան նշեց, որ տարուէ տարի աւելի կը դժուարանայ տպագիր մամուլ հրապարակելը եւ համապատասխան ընթերցող գտնելը: Գիտակցելով այն փաստին, որ աւելի դիւրին եւ արդիւնաւէտ պիտի ըլլայ այս աշխատութիւնը տեղափոխել ելեկտրոնային դաշտ, Գանտահարեան նշեց, որ հակառակ բազմաթիւ հարցերուն, այս գործը կը շարունակուի, նկատի ունենալով «Ազդակ» բացառիկի դերը: Ան շնորհակալութիւն յայտնեց հովանաւորներուն, լրագրողներուն եւ բոլոր անոնց, որոնք մասնակից եղած են այս աշխատութեան պատրաստման հոլովոյթին: Ըստ Շահան Գանտահարեանի, տրուած ըլլալով որ տպագրուող նիւթերու հասցեատէրը Թուրքիան է, ապա կը պատրաստուին նաեւ արաբալեզու բաժինին մէջ թրքերէն բաժին աւելցնել: Թէեւ Գանտահարեան թրքալեզու քարոզչամիջոցի ձեւաւորման աշխատանքները ուշացած կը նկատէ, սակայն կը կարծէ, որ ատիկա պէտք չէ սահմանափակել միայն 100-ամեակով, այլ այդ աշխատանքները պէտք է շարունակել նաեւ տարելիցէն ետք:
Գանտահարեան կարեւոր նկատեց թրքական լոպիինկին հակազդելու համար հայաստանեան ցանցային տեղեկատուական կեդրոններու համակարգուած աշխատանքը: Ան նաեւ նկատել տուաւ, որ հայ-ազրպէյճանական սահմանի ներկայ լարուածութիւնը կապուած է Հայոց ցեղասպանութեան 100-րդ տարելիցին հետ:
Իր կարգին, երեսփոխան Յակոբ Բագրատունի նշեց, որ պատանի տարիքէն աշխատած է «Ազդակ» օրաթերթին մէջ եւ իր քաղաքական փորձառութիւնը ձեռք ձգած է այնտեղ աշխատելու ընթացքին: Ըստ Բագրատունիի, ցեղասպանութենէն 12 տարի ետք հիմնադրուած «Ազդակ»-ը այսօր կը նկատուի Լիբանանի մէջ հրատարակուող բոլոր թերթերուն` հայատառ, արաբատառ, ֆրանսատառ եւ անգլիատառ անդրանիկ զաւակը, անիկա հնագոյն թերթն է, որ Լիբանանի մէջ կը հրատարակուի անընդմէջ, ինչ որ մեծ նուաճում է ոչ միայն Լիբանանի, այլեւ համայն հայութեան համար: Ըստ երեսփոխանին, թէեւ «Ազդակ»-ը Լիբանանի մէջ լոյս կը տեսնէ, սակայն անիկա համահայկական թերթ է` ի հայրենիք եւ ի սփիւռս աշխարհի, թերթը կ՛անդրադառնայ համայն հայութեան խնդիրներուն եւ Հայաստանի մէջ կատարուող իրադարձութիւններուն: Ան աւելցուց, որ 1970-ական թուականներէն հրատարակուող «Ազդակ» բացառիկը պատմագիրք է եւ մնայուն արժէք` ապագայ սերունդներուն համար:
Շնորհահանդէսի ընթացքին խօսք առին նաեւ ՀՄԸՄ-ի Կեդրոնական վարչութեան ատենապետ Գառնիկ Մկրտիչեան, Պուէնոս Այրէսի Սան-Անտրեսի համալսարանի միջազգային յարաբերութիւններու եւ քաղաքականութեան դասախօս Խաչիկ Տէր Ղուկասեան: Շնորհահանդէսին ներկայ էին ազգագրագէտ Հրանուշ Խառատեան, Ազգային ժողովի պատգամաւոր Աղուան Վարդանեան, «Փիւնիկ» հիմնադրամի համանախագահ Գաբրիէլ Չեմպերճեան, հասարակական-քաղաքական գործիչներ Հայաստանէն եւ սփիւռքէն, հայագէտներ եւ լրագրողներ:
Լուսանկարը` ԳԱԲՐԻԷԼ ՓԱՆՈՍԵԱՆի, ձախէն աջ՝ Շահան Գանտահարեան, Յակոբ Բագրատունի, Թաթուլ Յակոբեան
ԱԶԴԱԿ, 27 յունուար, 2015թ.
