Այսօր՝ ապրիլի 2-ին, Տավուշի մարզի Բերդի համայնքապետ Հարություն Մանուչարյանը իր աշխատավայրում ընդունել է «Դովեղ» ֆուտբոլային ակումբի ղեկավար Թաթուլ Հակոբյանին և ակումբի տարածաշրջանի մարզիչ Աշոտ Գալստյանին:
Հանդիպման ընթացքում Հակոբյանը համայնքապետին ներկայացրել է ակումբի առաջիկա անելիքներն ու նպատակները Բերդի տարածաշրջանում:
«Ապրիլ ամսվա ընթացքում ակումբը սկսում է 2005-2007 թվականներին ծնված ապագա ֆուտբոլիստների ընդունելություն: Մայիսից մարզիչ Աշոտ Գալստյանը սկսելու է պարապմունքները: Մենք նպատակ ունենք Բերդի տարածաշրջանի երեխաներով համալրված թիմով սեպտեմբերից մասնակցել Հայաստանի ֆուտբոլի մանկապատանեկան առաջնության մինչև 14 տարեկանների մրցաշարին»,- ասել է Հակոբյանը:
Մարզիչ Աշոտ Գալստյանը նշել է, որ մարզումները կսկսեն Ներքին Կարմիր Աղբյուր գյուղի դպրոցի դաշտում: Հետագայում, երբ գյուղի ֆուտբոլի մարզադաշտը կվերանորոգվի, մարզումներն ու առաջնության խաղերը կանցկացնեն այդ ստադիոնում:
Համայնքապետ Հարություն Մանուչարյանը ողջունել է «Դովեղ» ֆուտբոլային ակումբի՝ Բերդի տարածաշրջանում գործունեության մտադրությունը և ընդգծել, որ ինքը և քաղաքային իշխանությունները կանեն հնարավորը, որպեսզի օգտակար լինեն ակումբի գործունեությանը: Երբ հաջողությունը լինի տեսանելի, մենք կանենք ավելին, ասել է համայնքապետը:
Հայաստանի արդարադատության նախարարության իրավաբանական անձանց պետական ռեգիստրում 2018 թվականի մարտի 15-ին գրանցվել է «Դովեղ» ֆուտբոլային ակումբ հասարակական կազմակերպությունը, որի հասցեն Նոյեմբերյան խոշորացված համայնքի Դովեղ բնակավայրն է՝ Հայաստան-Ադրբեջան սահմանին:
Ակումբի Կանոնադրության մեջ ասվում է.
«Դովեղ» ֆուտբոլային ակումբ հիմնական նպատակն է Հայաստանում, մասնավորապես սահմանամերձ Տավուշի մարզում ֆուտբոլային թիմերի հիմնադրումը, օժանդակումը և պահպանումը, նրանց մասնակցության ապահովումը ֆուտբոլի միջազգային և Հայաստանի մրցումներին՝ սկսած մանկապատանեկանից մինչև մեծահասակների առաջնություններ, գավաթային և այլ խաղարկություններ։ Կազմակերպության նպատակներից են ֆուտբոլի մասսայականացմանը նպաստելը Հայաստանում և սահմանամերձ Տավուշի մարզում, սպորտի, առաջին հերթին՝ ֆուտբոլի միջոցով խաղաղության և համերաշխության տարածումը Հայաստանում, հարևան երկրներում և աշխարհում»։
«Դովեղ» ֆուտբոլային ակումբի լրատվությունը հասանելի է www.aniarc.am կայքում, ինչպես նաև՝ ակումբի ֆեյսբուքյան էջում՝ Դովեղ ֆուտբոլային ակումբ/Dovegh Football Club:
Ակումբի հետ կապվելու համար պետք է գրել հետևյալ էլեկտրոնային հասցեին՝ doveghfc@gmail.com:
«Դովեղ» ֆուտբոլային ակումբ
2 ապրիլի, 2018 թ
