«Դովեղ» ֆուտբոլային ակումբը հայտարարում է մարզիչների ընդունելության մրցույթ:
Մրցույթին կարող են դիմել նրանք, ովքեր հետաքրքրված են և ունեն կարողություններ մարզչական աշխատանք կատարել 12-ից 15 տարեկան մանուկների և պատանիների հետ Նոյեմբերյան համայնքում:
Դիմողները պետք է մինչև 2018 թվականի ապրիլի 5-ը ակումբի էլեկտրոնային հասցեին՝ doveghfc@gmail.com կամ ֆեյսբուքի էջին՝ Դովեղ ֆուտբոլային ակումբ/Dovegh Football Club, ուղարկեն հակիրճ կենսագրական՝
անուն,
ազգանուն,
ծննդյան վայր և թվական,
մարզչական անցյալի մասին կարճ տեղեկություններ,
էլեկտրոնային հասցե (եթե կա) և հեռախոսահամար:
Մրցույթին կարող են դիմել Նոյեմբերյան (Բաղանիս, Բարեկամավան, Բերդավան, Դովեղ, Կոթի, Ոսկեպար, Ոսկեվան, Ջուջևան), Այրում (Արճիս, Բագրատաշեն, Դեբեդավան, Դեղձավան, Լճկաձոր, Հաղթանակ, Պտղավան) և Կողբ (Զորական) համայնքների քաղաքացիները, ինչպես նաև Հայաստանի Հանրապետության և Արցախի Հանրապետության որևէ քաղաքացի, ով ընտրվելու դեպքում պատրաստ կլինի տեղափոխվել և աշխատել Նոյեմբերյան համայնքում:
Ապրիլի 7-ին տեղի կունենա մարզիչի (մարզիչների) ընտրության մրցույթը:
Մրցույթի անցկացման հստակ տեղի և ժամի մասին նամակով կտեղեկացվեն դիմողները անհատապես:
«Դովեղ» ֆուտբոլային ակումբը ուշադրություն է հրավիրում հետևյալի վրա. ընտրված մարզիչի (մարզիչների) հետ սկզբնական շրջանում կնքվելու է միայն երեքամսյա աշխատանքային պայմանագիր, որը կարող է և պետք է երկարաձգվի՝ պայմանավորված մի շարք հանգամանքներով, որոնց մասին մարզիչները մանրամասնորեն կտեղեկացվեն մրցույթի ընթացքում:
Այլ տեղեկություններ «Դովեղ» ֆուտբոլային ակումբի մասին
Հայաստանի արդարադատության նախարարության իրավաբանական անձանց պետական ռեգիստրում 2018 թվականի մարտի 15-ին գրանցվել է «Դովեղ» ֆուտբոլային ակումբ հասարակական կազմակերպությունը, որի հասցեն Նոյեմբերյան խոշորացված համայնքի Դովեղ բնակավայրն է:
Ակումբի Կանոնադրության մեջ, ի մասնավորի, ասվում է.
«Դովեղ» ֆուտբոլային ակումբ հիմնական նպատակն է Հայաստանում, մասնավորապես սահմանամերձ Տավուշի մարզում ֆուտբոլային թիմերի հիմնադրումը, օժանդակումը և պահպանումը, նրանց մասնակցության ապահովումը ֆուտբոլի միջազգային և Հայաստանի մրցումներին՝ սկսած մանկապատանեկանից մինչև մեծահասակների առաջնություններ, գավաթային և այլ խաղարկություններ։ Կազմակերպության նպատակներից են ֆուտբոլի մասսայականացմանը նպաստելը Հայաստանում և սահմանամերձ Տավուշի մարզում, սպորտի, առաջին հերթին՝ ֆուտբոլի միջոցով խաղաղության և համերաշխության տարածումը Հայաստանում, հարևան երկրներում և աշխարհում»։
Ֆուտբոլային ակումբի հիմնադիր Թաթուլ Հակոբյանը նշել է, որ ակումբը ջանալու է արդեն 2018-2019 թթ. Հայաստանի ֆուտբոլի մանկապատանեկան և պատանեկան առաջնություններում մասնակցել մեկ կամ ավելի թիմերով:
«Մեր ուշադրության և գործունեության տարածքն ընդգրկելու է Տավուշի մարզի Նոյեմբերյանի շրջանը, այդ թվում՝ սահմանամերձ Բերդավան, Դովեղ, Բարեկամավան, Կոթի, Ոսկեվան, Բաղանիս և Ոսկեպար բնակավայրերը, որոնք այսօր մաս են կազմում խոշորացված Նոյեմբերյան համայնքի»,- ասել է Հակոբյանը:
Այս շրջանում ֆուտբոլը տարածված և սիրված մարզաձև է: 1990-ից 1996 թվականներին Նոյեմբերյանի «Պահածոյագործ», ապա «Ազնավուր» թիմերը մասնակցել են ֆուտբոլի Հայաստանի բարձրագույն խմբի առաջնություններին և գավաթի խաղարկություններին՝ հասնելով հաջողությունների: Այսօր շրջանի երեք թիմեր մասնակցում են Հայաստանի մանկապատանեկան առաջնություններին:
«Դովեղ» ֆուտբոլային ակումբը ծրագրել և նպատակադրվել է առաջիկա երեք-չորս տարիների ընթացքում հանդես գալ ֆուտբոլի Հայաստանի առաջին խմբի առաջնությունում:
«Մենք ուզում ենք պրոֆեսիոնալ ֆուտբոլը բերել Նոյեմբերյան և ուրախացնել տեղի ֆուտբոլասերներին: Այդ նպատակին հասնելու համար երազանքը, ցանկությունները և ֆինանսական միջոցները դեռևս բավարար չեն: Մենք ակնկալում ենք տեղական ինքնակառավարման մարմինների օժանդակությունը և համագործակցությունը: Ֆուտբոլում հաջողության հասնելու առաջին նախապայմանը նվիրումն է»,- ասել է ակումբի հիմնադիր Հակոբյանը:
Նա նաև նշել է, որ «Դովեղ» ֆուտբոլային ակումբը ցանկություն ունի տարածվել Տավուշի մարզի Բերդի տարածաշրջանում՝ այդ թվում Չինարի, Այգեձոր, Մովսես, Ներքին Կարմիր Աղբյուր, Այգեպար և Ադրբեջանին սահմանակից մյուս գյուղերում:
«Ցավոք, Բերդի տարածաշրջանում այս պահի դրությամբ չկա գեթ մեկ ֆուտբոլի դաշտ, որտեղ հնարավոր կլինի անցկացնել Հայաստանի մանկապատանեկան առաջնության մրցաշար: Փոքր ներդրումներով հնարավոր է կարգի բերել Ներքին Կարմիր Աղբյուր գյուղի մարզադաշտը: Մենք պատրաստ ենք այս և մյուս հարցերում գործակցել տեղական իշխանությունների հետ, որպեսզի ֆուտբոլը գա նաև Բերդի տարածաշրջան: Մենք ցանկություն ունենք ֆուտբոլը բերել մի շրջան, որն ասոցացվում է առավելապես հակամարտության ու կրակոցների հետ»,- ասել է Հակոբյանը:
Առաջիկա շաբաթներին ակումբը կկազմակերպի 12-ից 15 տարեկանների ընդունելություն: Այդ մասին առավել մանրամասն տեղեկատվություն կտարածենք՝ համագործակցելով տեղական ինքնակառավարման մարմինների հետ:
«Դովեղ» ֆուտբոլային ակումբի լրատվությունը հասանելի կլինի www.aniarc.am կայքում, ինչպես նաև՝ ակումբի ֆեյսբուքյան էջում` Դովեղ ֆուտբոլային ակումբ/Dovegh Football Club:
Ակումբի հետ կապվելու համար պետք է գրել հետևյալ էլեկտրոնային հասցեին՝ doveghfc@gmail.com, կամ զանգահարել՝ 091 42 64 35 կամ 098 65 53 21:
«Դովեղ» ֆուտբոլային ակումբ
21 մարտի, 2018 թ
