Հուլիսի 21-ի երեկոյան ժամը 18.30-ին Արցախի Ժուռնալիստների միությունում (Ստեփանակերտ, Թումանյան-63/15) Սիվիլնեթի լրագրող, Հայկական ուսումնասիրությունների ԱՆԻ կենտրոնի համակարգող Թաթուլ Հակոբյանը կներկայացնի Հայաստանի Հանրապետության առաջին վարչապետ Հովհաննես Քաջազնունու «Ազգ և հայրենիք» աշխատությունը, ինչպես նաև ելույթ կունենա «Հայ-թուրքական հարաբերությունները և Ադրբեջանը. 1917-1921 թթ» թեմայով:
Հայ քաղաքական ու փիլիսոփայական մտքի պատմության այս բացառիկ աշխատությունը՝ «Ազգ և հայրենիքը», առաջին անգամ հատվածաբար տպագրվել է ՀՅԴ ՀԱՅՐԵՆԻՔ (Բոստոն, ԱՄՆ) ամսագրում՝ 1923-1924 թվականներին, բացառությամբ վերջին երկու հատվածների:
«Քաջազնունին հայ քաղաքական մտքի պատմության մեջ բացառիկ տեղ ունի: Նրա այս հատորը շատ ծանոթ չէ Հայաստանի ընթերցողին: Եվ որպես պետական-քաղաքական գործիչ, և որպես գրող, ցավոք, Քաջազնունին ըստ արժանվույն գնահատված չէ ո՛չ Սփյուռքում, ո՛չ Հայաստանում: Վերահրատարակելով նրա աշխատությունները, ԱՆԻ կենտրոնը իր համեստ լուման է ներդնում այս խոշոր հային, այս խոշոր անհատականությանը ժամանակակիցներին ծանոթացնելու համար», ասել է Թաթուլ Հակոբյանը:
Հուլիսի 21-ին Արցախի ընթերցասեր հասարակությունը հնարավորություն կունենա ձեռք բերել ինչպես «Ազգ և հայրենիք» աշխատությունը, այնպես էլ ԱՆԻ կենտրոնի և Թաթուլ Հակոբյանի մյուս հրատարակությունները.
Հովհաննես Քաջազնունի, «Հ. Յ. Դաշնակցությունը անելիք չունի այլևս»,
Սիմոն Վրացյան, «Խարխափումներ»,
Արշակ Ջամալյան, «Հ. Քաջազնունին և Հ.Յ. Դաշնակցությունը»,
Ռուբէն Դարբինեան, «Մեր Պատասխանը Յովհաննէս Քաջազնունիի»,
Վահան Նավասարդյան, «Հ. Յ. Դաշնակցության անելիքը»,
«Հ. Յ. Դաշնակցությունը անելիք ունի՞, թե՞ չունի»,
Եղիշէ Քաջունի, «Զօրավար Անդրանիկ – Հայկական առանձին հարուածող զօրամասը»,
Թաթուլ Հակոբյան, «Արցախյան օրագիր. Կանաչ ու սեւ»,
Թաթուլ Հակոբյան, «Հայացք Արարատից. Հայերը և թուրքերը»:
