ԱՆԻ-ի կողմից հիշեցում․ Այս շրջանում Հայաստանն ու Ադրբեջանը ունեին դիվանագիտական հարաբերություններ դեսպանատների և դեսպանների մակարդակով, Ադրբեջանի խորհրդարանում հայերն ունեին 12 աթոռ, իսկ երկու հայեր մաս էին կազմում 1919-ի մարտին Ադրբեջանի վարչապետ դարձած Նասիբ Բեկ Ուսուբբեկովի կառավարությանը:
________________________
Ադրբեջանի արտաքին գործերի նախարարի հեռագիրը Հայաստանի արտաքին գործերի նախարարին
(Վրաստանի կառավարությանը կից Ադրբեջանի դիվանագիտական առաքելության տեղեկատու բյուրոյից)
«Տեղեկատու բյուրոն հաղորդում է, որ դեկտեմբերի 27-ին Ադրբեջանի արտաքին գործերի նախարարը Հայաստանի արտաքին գործերի նախարարին ուղարկել է հետևյալ հեռագիրը:
Մենք այսօր տեղեկություն ենք ստացել, որ հայկական կառավարությունը դեկտեմբերի 2-ին ռազմական գործողություններ է սկսել Զանգիբասարի շրջանի մուսուլմանների դեմ: Նույն թվականին կողոպտված և ավերված է Ղարղաբազար գյուղը: Ամսի 22-ին նույն վիճակին է ենթարկվել Ուլուխանլու գյուղը: Այժմ կռիվ է տեղի ունենում Չոբանքեարա և Ղարաղշլաղ գյուղերում:
Հայաստանի կառավարությունը, անկասկած, դրանով խախտում է Հայաստանի և Ադրբեջանի վարչապետների միջև նոյեմբերի 23-ին կայացած համաձայնությունը»:
«Յառաջ», կիրակի, 4 հունվարի, թիվ 3, 1920թ.
*****
ԱՆԻ-ի կողմից
Զանգիբասարի շրջանը մոտավորապես համապատասխանում է այսօրվա Մասիսի շրջանին Արարատի մարզում, իսկ Ուլուխանլուն այսօրվա Մասիս քաղաքի անվանումներից է:
