ՀՀԿ-ի նախընտրական ծրագիրը. «Անվտանգություն, առաջընթաց»

Մենք ապրում ենք մի տարածաշրջանում, որտեղ կան բազում սպառնալիքներ ու վտանգներ, մեծ է զինված բախումների հավանականությունը: Ադրբեջանի ապրիլյան արկածախնդրությունը և դրա վերաբերյալ Թուրքիայի դիրքորոշումը կրկին ապացուցեցին, որ մեր երկրի անվտանգության մակարդակի անընդհատ և հետևողական բարձրացումն այլընտրանք չունի։

Ոչ մի ազգ և ոչ մի երկիր մեր կողմից չի ընկալվում իբրև թշնամի։ Նույն կերպ հայ ժողովուրդը պահանջել և պահանջելու է, որ հարևան երկու երկրների իշխանությունները դադարեցնեն հայ ժողովրդի գոյության, ինքնիշխանության, կայուն ու անվտանգ զարգացման իրավունքը մերժող ու սեփական հասարակությանը դեպի բռնություն և այլատյացություն մղող քաղաքականությունը:

Մեր գործողությունները շարունակելու ենք ուղղել առաջին հերթին ազգային անվտանգության ինչպես առկա, այդպես էլ հնարավոր ռազմաքաղաքական սպառնալիքների, ռիսկերի և մարտահրավերների բացահայտմանն ու չեզոքացմանը, մեր ազգային բանակի մարտունակության շարունակական բարձրացմանն ու սպառազինմանը:

Անվտանգության համակարգերի բարեփոխման շարունակականությունն ու ժամանակակից պահանջներին համապատասխանեցումը, արտաքին մարտահրավերների կանխարգելմանն ու համարժեք պատասխանի ապահովմանն ուղղված քայլերը ներառել են և ներառելու են քաղաքական, դիվանագիտական, իրավական, տնտեսական, տեղեկատվական, անհրաժեշտության դեպքում՝ ռազմական և այլ համալիր միջոցառումներ:

Հավաքական անվտանգության պայմանագրի կազմակերպության կանոնադրությամբ Հայաստանի Հանրապետության ստանձնած պարտավորությունների և նպատակների իրականացումը շարունակելու է մնալ առաջնային: Հայաստանը հետևողականորեն իր ներդրումն է բերելու ՀԱՊԿ-ի հետագա ամրապնդման գործում:

Միաժամանակ շարունակվելու են խորանալ գործընկերային հարաբերությունները Հյուսիսատլանտյան դաշինքի հետ՝ հետապնդելով Հայաստանի Հանրապետության զինված ուժերի մարտունակության բարձրացման, զինված ուժեր – հասարակություն համագործակցության խորացման, պաշտպանական համակարգի շարունակական բարեփոխման նպատակներ:

Անվտանգության բնագավառը ներառում է նաև սոցիալական պաշտպանությունը, մարդու կյանքի, սեփականության և այլ իրավունքների պաշտպանությունն ու երաշխավորումը, պարենային անվտանգությունը: Մենք հասնելու ենք նրան, որ մեր քաղաքացին վստահ լինի՝ վաղվա օրն այսօրվանից ապահով է լինելու: Մեր քաղաքացին, ծանր վիճակում հայտնվելով, պետք է զգա պետության աջակցությունը: Դրան հասնելու համար մենք շարունակելու ենք ներդնել աղքատության նվազեցման կայուն մեխանիզմներ, ապահովելու ենք նվազագույն աշխատավարձի շարունակական աճ և էապես բարեփոխելու ենք մարդկանց զբաղվածությունն ապահովող պետական քաղաքականությունը: Միաժամանակ ձգտելու ենք նրան, որ մարդը, լինելով աշխատունակ, նվազագույնս զգա պետական սոցիալական ապահովության կարիքը, քանի որ ի վիճակի է լինելու սեփական աշխատանքով ապահովել իր և իր ընտանիքի բարեկեցությունը:

ՄԵՐ ԼԻՆԵԼՈՒԹՅԱՆ ԽԱՐԻՍԽԸ. ՀԱՅՈՑ ԲԱՆԱԿ

Մեր ժողովուրդը մշտապես արժևորել է կրթությունը: Մեր օրերում պետության հաջողության գլխավոր երաշխիքը կրթված սերունդն է, բարեկեցության աղբյուրը՝ գիտելիքը: Մեր երազած երկիրը ինտելեկտուալ Հայաստանն է: Հետևաբար կրթությունը պետք է լինի որակյալ ու հասանելի բոլորի համար: Որակյալ մասնագետները մեր երկրում միշտ պետք է լինեն պահանջված և զգան պետության աջակցությունը: Մեր խնդիրն է զարգացող աշխարհի պահանջներին ներդաշնակ կրթական ծրագրերի և միջազգային չափանիշներին համապատասխան դասագրքերի ապահովումը: Մենք պետք է ձգտենք հասնել նրան, որ մեր համալսարանները ճանաչված լինեն աշխարհի հեղինակավոր համալսարանների շարքում:

Պետությունների տնտեսական զարգացման կարևոր գրավականներից մեկը գիտության և բարձր տեխնոլոգիաների այնպիսի ուղղությունների կայացումն է, որոնք ստեղծում են հավելյալ արժեք: Տարիներ շարունակ մենք կարողացել ենք արձանագրել հաջողություններ և ունեցել ենք տեսանելի նվաճումներ գիտության ոլորտում: Տեղեկատվական տեխնոլոգիաների ոլորտում նման հաջողությունների մենք այսօր ևս ականատես ենք լինում, սակայն Հայաստանում արտադրված կիրառական գիտական արդյունքները պետք է մրցունակ լինեն համաշխարհային նորարարությունների շուկայում: Այդ իսկ պատճառով գիտությանը հատկացվող հիմնական ֆինանսական աջակցությունը պետք է ուղղվի նաև դեպի իրականում կիրառելի, շոշափելի արդյունքներ նախանշող, հեռանկարային ուղղություններ: Մասնավորապես, գտնվելով ո՛չ պատերազմ, ո՛չ խաղաղություն վիճակում՝ մեր երկրի համար մեծ կարևորություն է ունենալու գիտական նորարարությունների կիրառումը ռազմարդյունաբերության ոլորտում: Մենք պետք է ձևավորենք խրախուսական միջավայր գիտությամբ զբաղվելու և որակյալ գիտական արտադրանք ստեղծողների համար:

Մեր ախտորոշումն է. Հայաստանի Հանրապետության կրթության և գիտության համակարգում տեսանելի են հետևյալ խնդիրները՝

• նախադպրոցական կրթության ընդգրկվածության ցածր մակարդակ,
• հանրակրթական ուսումնական հաստատությունների հանրային հաշվետվողականության ցածր մակարդակ,
• գործող ուսումնական հաստատությունների ֆինանսավորման համակարգը չի ապահովում արդյունավետ լուծումներ առկա խնդիրների համար,
• կրթության բովանդակությունը լիովին չի համապատասխանում հասարակության զարգացման արդյունքում առաջացող պահանջներին,
• գիտական ենթակառուցվածքների և գիտության զարգացման արդի պահանջների միջև անհամապատասխանություն,
• ճարտարագիտական և կիրառական հետազոտությունների ընդհանուր ծավալը շատ փոքր է ֆինանսավորվող գիտական հետազոտություններում։

Արդյունքում ունենք՝

• կրթական ծրագրերի անբավարար մակարդակ և առկա պահանջների հետ անհամապատասխանություն,
• դասագրքերի բովանդակության չափանիշների և կազմման թերի մեթոդաբանություն,
• կրթական գործընթացում նորարարական և տեխնոլոգիական կրթական մեթոդների կիրառման փոքր ծավալներ,
• գյուղական դպրոցներում որակյալ ուսուցում ապահովելու համար առկա մանկավարժական և նյութատեխնիկական միջոցների անբավարարություն,
• բուհ-գիտահետազոտական կազմակերպություն-աշխատաշուկա համագործակցու­թյան ոչ բավարար մակարդակ։

Մեր նպատակն է. ունենալ ինտելեկտուալ Հայաստանի հիմնաքար հանդիսացող, ժամանակակից հմտություններով և լայն մտածելակերպով օժտված շրջանավարտներ տվող կրթագիտական համակարգ:

Այդ նպատակով պետք է՝

• մշակել ֆինանսավորման նոր մեխանիզմ «Միջին բեռնվածության դպրոց» և «Թերբեռնված դպրոց» կատեգորիաների դպրոցների համար,
• իրականացնել բարձրագույն կրթության ֆինանսավորման բարեփոխումներ՝ կապելով ֆինանսավորումը յուրաքանչյուր առարկայի, ոչ թե կիսամյակի հետ,
• ընդլայնել նախադպրոցական ծառայությունների ցանցը և ուսումնասիրել նախակրթարանները 12-ամյա կրթության համակարգում (1+11) ներառելու արդյունավետությունը,
• ապահովել առցանց դասընթացների, տեսադասերի և պարապմունքների մշակումը, ներդրումն ու հասանելիությունը ՀՀ գյուղական համայնքներում,
• ձևավորել ազգային կրթակարգ՝ միաժամանակ հանրակրթական ծրագրերում ավելացնելով շեշտադրումը օտար լեզուների, բնագիտական առարկաների և մաթեմատիկական առարկաների վրա,
• առարկայական ծրագրերը համապատասխանեցնել արդի պահանջներին, սահմանել դասագրքերի նոր չափորոշիչներ և վերանայել դասագրքերի բովանդակությունը,
• իրականացնել բուհական համակարգի կառուցվածքային բարեփոխումներ և ձևավորել ինժեներատեխնիկական ու բնագիտական կլաստերներ,
• ընդլայնել և բազմազանեցնել բուհերի միջազգայնացման գործընթացը,
• ապահովել Հայաստանի` եվրոպական բարձրագույն կրթական տարածքի գործընթացներին շարունակական ակտիվ մասնակցությունը համաեվրոպական և ազգային մակարդակներում, ինչպես նաև Բոլոնիայի գործընթացի նպատակների ու խնդիրների հետևողական իրագործումը,
• գիտության բնագավառում իրականացնել կառուցվածքային բարեփոխումներ,
• գիտական և գիտատեխնիկական գործունեության բազային ֆինանսավորման ծրագրերի մեջ ավելացնել շուկայական պահանջից և պետության զարգացման տեսլականից բխող կիրառական հետազոտությունների մասնաբաժինը։

Մեր երկրում կրթության առաջնայնության նպատակադրման հիմքում մեր մանկավարժներն են, ուստի պետությունը պետք է հստակ ընդգծված վերաբերմունք ունենա մանկավարժների հանդեպ: Մանկավարժները մեր երկրում պետք է լինեն գնահատված և զգան պետության հոգածությունը: Մանկավարժի աշխատանքը պետք է լինի պատվաբեր և պահանջված, մանկավարժը պետք է լինի հպարտ իր մասնագիտությամբ և կեցությամբ:

ԱՌՈՂՋԱՊԱՀՈՒԹՅՈՒՆ