1918-1920 թթ. Հայաստանն ու Ադրբեջանը անկախ պետություններ էին: Չնայած երկու երկրների միջև տարածքային վեճերին ու հավակնություններին, որոնք նաև վերաճում էին սահմանային ընդհարումների և հայ-թաթարական արյունալի բախումների, Բաքվում գործում էր Հայաստանի դիվանագիտական առաքելությունը, իսկ Երևանում՝ Ադրբեջանինը, այսինքն՝ երկու երկրները միմյանց մայրաքաղաքներում ներկայացված էին դեսպանների մակարդակով: Հայաստանում իշխող ուժը ՀՅԴ-ն էր, Ադրբեջանում՝ Մուսավաթը:
_________________________________________
Ադրբեջանի վարչապետի շնորհակալական հեռագիրը Խատիսյանին
Նախարարապետ Ա. Խատիսյանին
Բաքու, 19 հունվար
Ադրբեջանի կառավարությունը սրտանց շնորհակալ է Հայաստանի կառավարության շնորհավորանքների համար Բարձրագույն խորհրդի կողմից Ադրբեջանի անկախության ճանաչման առթիվ:
Ադրբեջանի կառավարությունը խորապես հավատացած է, որ դրացի Ադրբեջանի և Հայաստանի միջև, որոնց ժողովուրդները պատմականորեն սերտորեն կապված են միմյանց, կհաստատվեն ամենաբարեկամական դրացիական հարաբերություններ:
Նախարարապետ՝ Ուսուբբեկով
Յառաջ, թիվ 16, 23 հունվար, 1920թ.
_________
Հ. Գ. 1919թ. մարտին հրաժարական էր տվել Ֆաթհալի Խան Խոյսկու երրորդ կառավարությունը: Ադրբեջանի վարչապետ էր դարձել Նասիբ Բեկ Ուսուբբեկովը, ով նաև զբաղեցրեց ներքգործնախարարի աթոռը: Նրա կոալիցիոն կառավարության նախարարներից երկուսը ազգությամբ հայ էին՝ Խորեն Համասփյուռը (կանգնած, ձախից առաջինը) ու Աբրահամ Դաստակյանը (Դաստակով) (նստած, աջից առաջինը): Երկուսն էլ ներկայացրել են ՀՅԴ-ն: Դաստակյանը զբաղեցրել է առողջապահության նախարարի աթոռը, իսկ Համասփյուռը եղել է նախարար՝ առանց պորտֆելի:
Կարդալ նաև՝
https://www.aniarc.am/2017/01/14/armenia-1920-january-congradulates-azerbaijan-georgia/
