«Անընդունելի իրավիճակը աւարտած է, սակայն ամբողջական հանգուցալուծման համար տակաւին կանուխ է», երէկ նախագահի նստավայրին մէջ հասարակութեան տարբեր շերտերու ներկայացուցիչներու հետ հանդիպումի մը ընթացքին յայտարարած է Հայաստանի նախագահ Սերժ Սարգսեան` մեկնաբանելով ոստիկանութեան պարեկապահակային ծառայութեան գունդին վրայ զինեալներու խումբի կատարած յարձակման պատճառով ստեղծուած իրավիճակը:
«Նախ եւ առաջ պէտք է իրականացուի մանրազնին հետաքննութիւն, համակողմանի եւ անաչառ քննութիւն, բաց դատավարութիւն: Իւրաքանչիւր անձ պէտք է պատասխան տայ իր արարքներուն համար միայն ու միայն օրէնքի առջեւ: Որեւէ այլ դրսեւորում պիտի չըլլայ, անձնական վրէժխնդրութեան բոլոր փորձերը պիտի կասեցուին օրէնքի ուժով», վստահեցուցած է նախագահը:
«Հասած է եզրակացութիւններ կատարելու ժամանակը: Այս իրադարձութիւններու ամբողջական վերլուծութիւնը դեռ երկար ժամանակ կը պահանջէ: Սակայն մէկ բան ակնյայտ է. ներհայաստանեան հասարակական եւ քաղաքական կեանքին մէջ անհրաժեշտ է արագացնել արմատական փոփոխութիւններու հոլովոյթը», նշած է նախագահը:
Նախագահ Սարգսեան իր ելոյթին զգալի մասը տրամադրած է «զէնքով եւ բռնութեամբ հարցեր լուծելու աղէտալի մտայնութեան» եւ անթոյլատրելի նկատած է անցեալ երկու շաբթուան ընթացքին երկրին կրած կորուստները` «մարդկային, հասարակական, արժէքային կորուստներէն սկսեալ մինչեւ այն հսկայական հարուածը, որ ունեցաւ մեր տնտեսութիւնը»:
«Զէնքով եւ բռնութեամբ Հայաստանի մէջ հարցեր չեն լուծուիր», ըսած է նախագահ Սերժ Սարգսեան` աւելցնելով. «Ոեւէ անձ կրնայ չսիրել իշխանութիւնները, կրնայ չսիրել կառավարութիւնը, չսիրել նախագահը եւ կտրուկ դէմ ըլլալ այն քաղաքականութեան, որ կ՛իրականացուի, բայց չսիրելը ամենեւին հիմք չէ հերոսացնելու համար զէնքով հարցեր լուծողը: Իշխանութիւնները կու գան ու կ՛երթան, ահաբեկչութեան խրախուսումը քաղցկեղի պէս կը մնայ ու կը տարածուի, կ՛ոչնչացնէ մեր ժողովուրդին կողմէ ստեղծուած ամէն ինչ: Ասկէ պէտք է սարսափիլ, ասիկա հիմնովին պէտք է արմատախիլ ընել»:
Հանրապետութեան նախագահը խօսած է նաեւ երկրին մէջ գոյութիւն ունեցող խնդիրներուն «լուծումները արագացնելու» անհրաժեշտութեան մասին` նշելով. «Այս փուլին մեր նպատակը նաեւ ազգային համաձայնութեան իշխանութիւն ձեւաւորելն է, ուր լուծումներու իրականացումը կ՛ըլլայ լայն համաձայնութեան դաշտի պատասխանատուութեան ներքոյ: Սահմանադրական բարեփոխումները այդ մասին էին, այդպիսի իշխանութիւն ձեւաւորելու հիմքը դրուած է այդ բարեփոխումներով»:
Պնդելով, որ նման «Ազգային համաձայնութեան կառավարութեան» ձեւաւորման հաստատութենական ամբողջ հենքը արդէն ապահովուած է, նախագահ Սարգսեան յայտարարած է. «Վստահաբար կը պնդեմ, որ ընդամէնը ամիսներ ետք մենք պիտի ունենանք այդպիսի կառավարութիւն, այդպիսի իշխանութիւն»:
Նախագահ Սարգսեան անդրադարձած է նաեւ Լեռնային Ղարաբաղի բանակցութիւններուն` վստահեցնելով, որ «միակողմանի զիջումներ պիտի չըլլան»:
«Լեռնային Ղարաբաղը երբեք պիտի չըլլայ Ազրպէյճանի կազմին մէջ: Բացառուած է: Անգամ մը եւս կը կրկնեմ` բացառուած է: Ես իմ ամբողջ գիտակցական կեանքս նուիրած եմ այս խնդիրին: Եւ իմ ժողովուրդիս համար ընդունելի տարբերակի հասնելու համար միշտ պատրաստ եղած եմ զոհաբերելու ոչ միայն պաշտօն, այլեւ կեանքս», յայտարարած է նախագահ Սերժ Սարգսեան:
ԱԶԴԱԿ, 2 Օգոստոսի, 2016թ.
