Այսօրվա Հայաստանի Հանրապետության տարածքում բնակչության թիվը 1831 թվականին կազմել է 161.747 հոգի, որից հայերը՝ 110.671, մուսուլմանները՝ 50.274, այլք՝ 802:
Ըստ էության, Հայաստանում մարդահամար, աշխարհագիր կամ բնակչության հաշվառում առաջին անգամ անց է կացվել այն բանից հետո, երբ ցարական Ռուսաստանը Պարսկաստանից գրավեց Անդրկովկասը (1801-ից մինչև 1829 թվականը ընկած ժամանակահատվածում, բացառությամբ Աղբաբայի, այսօր՝ Աշոցք-Ամասիա, և Բաթումի շրջանների, որոնք Օսմանյան կայսրությունից Ռուսաստանին են անցել 1878-ին):
Ստորև ներկայացնում ենք Հայաստանի բնակչության թվաքանակը 1831-ից 2018 թվականների ընթացքում՝ հաշվի առնելով այսօրվա Հայաստանի Հանրապետության տարածքը: Այսինքն, երբ ներկայացնում ենք, օրինակ, 1831 կամ 1897 թվականի տվյալները, ապա նկատի ունենք այն բոլոր բնակավայրերի բնակչության ընդհանուր գումարը, որոնք այսօր մաս են կազմում Հայաստանի Հանրապետության տարածքի:
Թիվ Բն. քանակը
1831 161, 747 հոգի
1873 496,140
1886 635,833
1897 797,853 ցարական առաջին և վերջին մարդահամար
1914 1,014,255 Առաջին աշխարհամարտի տարին
1919 961,677 Հայաստանի Առաջին Հանրապետության շրջան
1922 752,052
1926 880,464 ԽՍՀՄ առաջին մարդահամար
1931 1,050,633
1939 1,282,338 ԽՍՀՄ երկրորդ մարդահամար
1959 1,763,048 ԽՍՀՄ երրորդ մարդահամար
1970 2,491,873 ԽՍՀՄ չորրորդ մարդահամար
1979 3,037,259 ԽՍՀՄ հինգերորդ մարդահամար
1989 3,304,776 ԽՍՀՄ վեցերորդ մարդահամար
2001 3,213,011 Հայաստանի Հանրապետության առաջին մարդահամար
2011 3,018,854 Հայաստանի Հանրապետության երկրորդ մարդահամար
2016թ. հունվարի 1-ի դրությամբ Հայաստանի մշտական բնակչության թվաքանակի ցուցանիշը, ընթացիկ հաշվառմամբ (2011թ. մարդահամարի հիմքով վարվող) կազմել է 2 միլիոն 998 հազար 600 մարդ` ըստ Ազգային վիճակագրական ծառայության տվյալների:
2017թ. հունվարի 1-ի դրությամբ այն կազմել է 2 միլիոն 986 հազար 500 մարդ:
2018թ. հունվարի 1-ի դրությամբ այն կազմել է 2 մլն 972 հազար 900 մարդ:
Իրականում, Հայաստանի առկա բնակչությունը 2.8 միլիոն է՝ ըստ պաշտոնական տվյալների:
Ինչպես նկատում եք, առաջին անգամ Հայաստանի բնակչության թիվը մեկ միլիոնը գերազանցել է 1914-ին՝ Առաջին Աշխարհամարտի տարում: Հասկանալի պատճառներով՝ այն նվազել է և ապա կրկին հասել է մեկ միլիոնի 1930-ին:
Հայաստանի բնակչության թիվը 60-ական թթ. կեսերին արդեն գերազանցել է 2 միլիոնը, իսկ 3 միլիոնը գերազանցել է 1979 թվական ԽՍՀՄ հինգերորդ մարդահամարի տվյալներով:
Թաթուլ Հակոբյան
Այս տվյալները վերցրել ենք Իվան Շոպենից, Զավեն Կորկոտյանից, Խորհրդային Հայաստանի և Հայաստանի Հանրապետության մարդահամարների պաշտոնական և Ազգային վիճակագրական ծառայության տվյալներից:
