Ալեքսանդրապոլի գրավումը
[1918 թ] դեկտեմբերի 4-ի երեկոյան ժամը 4-ին մեր զորքերը, հրամանատարությամբ փոխգնդապետ Նեստերովսկու, մտան Ալեքսանդրապոլ:
Քաղաքում լիակատար կարգ ու կանոն է: Թուրքերը դեռ մնում են կայարանում:
Թուրքերը շնորհակալություն հայտնեցին այն կարգապահության համար, որով մեր զորքերը ընդունեցին քաղաքը:
Ամեն տեղ պահակներ են նշանակված:
Մեր ձեռքն է անցել բազմաթիվ միլիոնների հասնող զինամթերք:
Հաղորդակցություն է հաստատված Ալեքսանդրապոլի, Ղարաքիլիսայի և Երևանի միջև:
Թուրքերը ամրանում են Ալեքսանդրապոլից արևմուտք:
Կարսի գաղթականությունը գալիս է Ալեքսանդրապոլ, նա սարսափելի դրության մեջ է, որովհետև մթերք չկա:
Ժողովուրդ, թիվ 41, ուրբաթ, դեկտեմբերի 6, 1918
—–
Ալեքսանդրապոլից Դրոն դեկտեմբերի 6-ին ներքին գործերի նախարարին հեռագրում է հետևյալը.
Քաղաքը, բերդը և կայարանը ընդունեցինք, թուրքերը իրենց հետ տարել են պետական և հասարակական հիմնարկությունների կայքերը և գույքերը, հեռագրական և հեռախոսային ապարատները, հիվանդանոցային և երկաթուղային իրերը:
Ձեր կարգադրության համաձայն քաղաքը և շրջանը միացվում է Ղարաքիլիսայի և Դիլիջանի շրջանին: Ալեքսանդրապոլի շրջանի ընդհանուր կառավարիչ է նշանակվել Գ. Խոյեցյանը: Նշանակվել են նաև գավառական և քաղաքային վարչություններ, քաղաքի և բերդի պարետի պարտականությունները ժամանակավորապես հանձնել են փոխգնդապետ Նեստերովսկուն:
Քաղաքում կարգը օրինակելի է:
Ժողովուրդ, թիվ 44, ուրբաթ, դեկտեմբեր 13, 1918
