ԱՄԵՆԱՅՆ ՀԱՅՈՑ ՀԱՅՐԱՊԵՏԸ ԱՆԳԱՐԱՅՈՒՄ ԱՅՑԵԼՈՒՄ Է ԹՈՒՐՔԱԿԱՆ ԿԱՌԱՎԱՐՈՒԹՅԱՆ ՆԱԽԱԳԱՀ ԶՈՐԱՎԱՐ ՋԵՄԱԼ ԳՅՈՒՐՍԵԼԻՆ
Հուլիսի 17-ին, երկուշաբթի, Ամենայն Հայոց Վեհափառ Հայրապետը Անգարայում այցելում է Թուրքական Հանրապետության Նախագահ Նորին Վսեմություն զորավար Ջեմալ Գյուրսելին:
Պաշտոնական այս այցելության ժամանակ, Ամենայն Հայոց Հայրապետին ուղեկցում են Տ. Կոմիտաս եպիսկոպոս Տեր-Ստեփանյանը, գավազանակիր Տ. Պարգև վարդապետ Գևորգյանը և պատրիարքական փոխանորդ Տ. Արամ ավագ քահանա Պասմաճյանը:
Ամենայն հայոց Վեհափառ Հայրապետը, Իր հետևորդներով, ժամը 9.15-ին ժամանում է Անգարայի էսենբողայի օդանավակայանը:
Հանուն Կառավարության Նախագահի, Ամենայն Հայոց Վեհափառ Հայրապետին դիմավորում և բարի գալուստ է մաղթում արտաքին գործավարության պրոտոկոլի տեսուչ Սուլհի Տիշլիօղլուն: Վեհափառ Հայրապետին դիմավորում են նաև Սահմանադիր ժողովի անդամ օրիորդ Հերմինե Գալուստյանը, սովետական դեսպանատան երեք ներկայացուցիչներ և հայ գաղութը:
Հանրապետության Նախագահը երկու պաշտոնական ինքնաշարժ է տրամադրում Վեհափառ Հայրապետի և նրա շքախմբի համար:
Ամենայն Հայոց Վեհափառ Հայրապետը օդանավակայանի պատվո սրահում կարճ հանգստանալուց հետո, ժամը 10-ին այցելում է Անըթ Կապիր, Թուրք Հանրապետության առաջին Նախագահ Աթաթուրքի դամբարանը: Երկու զինվորներ կրում են Ամենայն Հայոց Վեհափառ Հայրապետի կողմից հուշարձանի վրա զետեղվելիք ծաղկեպսակը, ՎԱԶԳԵՆ Ա ԿԱԹՈՂԻԿՈՍ ԱՄԵՆԱՅՆ ՀԱՅՈՑ մակագրությամբ: Վեհափատ Հայրապետը ստորագրում է այցելուների պատվո մատյանում:
Ժամը 10.30-ին, Ամենայն Հայոց Վեհափառ Հայրապետը Չանգայայի ապարանքում այցելում է Պետության և Կառավարության Նախագահ Նորին Վսեմություն զորավար Ջեմալ Գյուրսելին:
Ամենայն Հայոց Հայրապետի և Վսեմաշուք Նախագահի միջև տեղի է ունենում ջերմ և հարգալիր զրույց:
Ընդունելությանը ներկա են Կոմիտաս սրբազանը, Պարգև վարդապետը, պատրիարքական փոխանորդ Տ. Արամ ավագ քահանան, Սահմանադիր ժողովի անդամ օրիորդ Հերմինե Գալուստյանը, պր. Կարապետ Աբրահամյանը և պրոտոկոլի տեսուչ Ս. Տիշլիօղլուն: Թարգմանչի պաշտոնը կատարում է օրիորդ Հերմինե Գալուստյանը:
«Էջմիածին», Պաշտոնական ամսագիր, Հայրապեկան Աթոռոյ Ս. Էջմիածնի, Ը, 1961, էջ 36
