1992-ի հունիսին, երբ ադրբեջանական ուժերը գրավեցին Շահումյանի շրջանը Արցախի հյուսիսում և առաջ էին շարժվում Մարտակերտի ուղղությամբ, Հայաստանի պաշտպանության նախարար Վազգեն Սարգսյանը խորհրդարանում՝ Գերագույն խորհրդում, ունեցավ ելույթ և առաջարկեց 8 կետանոց մի ծրագիր, որը մերժվեց։ 1992-ի սեպտեմբերին Լևոն Տեր-Պետրոսյանը պաշտպանության նախարար նշանակեց Վազգեն Մանուկյանին։
———————-
Ներկայացնում ենք Վազգեն Սարգսյանի՝ 1992թ․ հունիսի 22-ին խորհրդարանում հնչեցրած 8 առաջարկները․
1․ Ադրբեջանի հետ Հայաստանի սահմանամերձ շրջաններում մտցնել ռազմական դրություն։
2․ Պատերազմական գործողությունների ամբողջ ընթացքում Հայաստանի տարածքում ժամանակավորապես դադարեցնել քաղաքական բոլոր կուսակցությունների գործունեությունը։
3․ Բարձրացնել անօրինական կերպով ռազմական միավորումներ ստեղծող և ստեղծման փորձ կատարող անձանց քրեական պատասխանատվության հարցը։
4․ Հայաստանի ամբողջ տարածքում ժամանակավորապես արգելել ցույցերի, միտինգների և փողոցային երթերի կազմակերպումն ու անցկացումը։
5․ Զանգվածային լրատվության բոլոր միջոցներում մտցնել ռազմական գրաքննություն։
6․ Արգելել զինվորական տարիքի և զինապարտ տղամարդկանց ազատ արտահոսքը հանրապետության տարածքից։
7․ Արգելել բնակչության ազատ ուղևորությունները ԼՂՀ, ՀՀ Գորիսի, Կապանի, Մեղրու, Սիսիանի, Արարատի և Նոյեմբերյանի ռազմական գործողությունների շրջանները։
8․ Ռազմական գործողությունների շրջաններում (Մեղրի, Կապան, Գորիս, Սիսիան, Նոյեմբերյան և Արարատ) ստեղծել ռազմական խորհուրդներ ՀՀ նախագահի զինվորական ներկայացուցչի գլխավորությամբ՝ նրանց տալով շրջանի պաշտպանության հարցերի լուծման լիիրավ լիազորություններ։
Աղբյուրը՝ Հայաստանի Հանրապետություն օրաթերթ, թիվ 121, 23 հունիս, 1992թ․
Լուսանկարում՝ Վազգեն Սարգսյանը և Լևոն Տեր-Պետրոսյանը, 1996 թվականի լուսանկար
