Արգենտինայի հավաքականը դուրս եկավ Կատարում ընթացող ֆուտբոլի աշխարհի առաջնության քառորդ եզրափակիչ, որտեղ կմրցի Նիդերլանդների հավաքականի հետ: 1/8 եզրափակիչում արգենտինացիները դեկտեմբերի 3-ին 2-1 հաշվով առավելության հասան Ավստրալիայի հավաքականի նկատմամբ:
«Հաշիվը 35-րդ րոպեին բացեց ֆրանսիական ՊՍԺ-ի հարձակվող Լիոնել Մեսին, որը կարիերայի 1000-րդ խաղում խփեց 789-րդ գոլը: Դա «Ոսկե գնդակի» 7-ակի դափնեկրի առաջին գոլն էր աշխարհի առաջնությունների փլեյ-օֆֆ փուլում: Նախորդ 8 գոլերը Մեսին խփել է խմբային փուլերում:
ԱԱ-2022-ում Մեսին խփեց երրորդ գոլը և հավասարվեց ռմբարկուների ցուցակը գլխավորող էկվադորցի Էներ Վալենսիային, ֆրանսիացի Կիլիան Մբապեին, իսպանացի Ալվարո Մորատային, անգլիացի Մարկուս Ռեշֆորդին և հոլանդացի Կոդի Գակպոյին:
Լիոնել Սկալոնիի թիմի առավելությունը խաղի 57-րդ րոպեին կրկնապատկեց անգլիական «Մանչեսթեր Սիթիի» հարձակվող Խուլիան Ալվարեսը, որն օգտվեց ավստրալացիների դարպասապահ Մեթյու Ռայանի կոպիտ սխալից:
77-րդ րոպեին Ավստրալիայի հավաքականը կրճատեց հաշիվը: Կրեյգ Գուդվինի հարվածից հետո գնդակը դիպավ պորտուգալական «Բենֆիկայի» արգենտինացի կիսապաշտպան Էնցո Ֆերնանդեսին և, փոխելով ուղղությունը, հայտնվեց դարպասում:
Արգենտինայի հավաքականը դեկտեմբերի 9-ին քառորդ եզրափակիչում կմրցի Նիդերլանդների հետ, որն ավելի վաղ պայքարից դուրս էր թողել ԱՄՆ-ի հավաքականին:
Թիմերի մեկնարկային կազմերը.
Արգենտինա. Էմիլիանո Մարտինես, Նաուել Մոլինա, Քրիստիան Ռոմերո, Նիկոլաս Օտամենդի, Մարկոս Ակունյա, Էնցո Ֆերնանդես, Ռոդրիգո Դե Պաուլ, Ալեքսիս Մակալիստեր, Պապու Գոմես, Լիոնել Մեսի, Խուլիան Ալվարես:
Ավստրալիա. Մեթյու Ռայան, Ազիզ Բեհիչ, Քայլ Ռոուլս, Հարի Սութեր, Միլոշ Դեգենեկ, Կիանու Բակուս, Ջեքսոն Իրվին, Աարոն Մույ, Մեթյու Լեկի, Միչել Դյուկ, Ռայլի Մակգի:
Աղբյուրը՝ https://www.vnews.am/
