Կատարում ընթացող ֆուտբոլի աշխարհի առաջնության C խմբից 1/8 եզրափակիչի ուղեգիր նվաճեցին Արգենտինայի և Լեհաստանի հավաքականները:
Խմբային փուլի վերջին՝ երրորդ տուրում աշխարհի կրկնակի չեմպիոն արգենտինացիները 2-0 հաշվով հաղթեցին Լեհաստանի հավաքականին:
Մեքսիկայի հավաքականը 2-1 հաշվով ուժեղ գտնվեց Սաուդյան Արաբիայից: Մեքսիկացիները երկու գոլ խփեցին երկրորդ խաղակեսի սկզբնամասում, ինչին արաբական թիմը պատասխանեց ավելացված ժամանակում: 47-րդ րոպեին գոլի հեղինակ դարձավ Հենրի Մարտինը, 52-րդ րոպեին Լուիս Չավեսը կրկնապատկեց հաշիվը, իսկ ավելացված ժամանակի հինգերորդ րոպեին Սալեմ Ալ-Դոուսարին կրճատեց հաշվի տարբերությունը:
C խմբում 6 միավորով առաջին տեղը գրավեց Լիոնել Սկալոնիի գլխավորած Արգենտինայի հավաքականը, որը դեկտեմբերի 3-ին 1/8 եզրափակիչում կմրցի D խմբում երկրորդ տեղը զբաղեցրած Ավստրալիայի հետ:
Երկրորդ տեղով փլեյ-օֆֆի ուղեգիր նվաճած Լեհաստանի հավաքականը վաստակեց 4 միավոր և միայն խփած ու բաց թողած գոլերի ցուցանիշով գերազանցեց մեքսիկացիներին: Լեհաստանը խփել և բաց է թողել 2-ական գոլ, իսկ Մեքսիկան ունի երկու խփած և 3 բաց թողած գոլ: Առաջին տուրում արգենտինացիներին հաղթած Սաուդյան Արաբիան երեք միավորով գրավեց վերջին տեղը և ավարտեց պայքարը:
Լեհաստանի հավաքականը 1/8 եզրափակիչում դեկտեմբերի 4-ին կմրցի D խմբում հաղթած աշխարհի գործող չեմպիոն Ֆրանսիայի հետ:
Թիմերի մեկնարկային կազմերը.
Սաուդյան Արաբիա. Մոհամեդ Ալ-Օվայս, Հասան Ալ-Տամբակտի, Աբդուլելահ Ալ-Ամրի, Ալի Ալ-Բոլեահի, Սուլթան Ալ-Չաման, Ալի Ալ-Հասան, Մոհամեդ Կանո, Սաուդ Աբդուլհամիդ, Ֆիրաս Ալ-Բուրակիան, Սալեհ Ալ-Շեհրի, Սալեմ Ալ-Դոուսարի:
Մեքսիկա. Գիլյերմո Օչոա, Խեսուս Գալյարդո, Էկտոր Մորենո, Սեզար Մոնտես, Խորխե Սանչես, Լուիս Չավես, Էդսոն Ալվարես, Ալեքսիս Վեգա, Օրբելին Պինեդա, Իրվինգ Լոսանո, Հենրի Մարտին:
Աղբյուրը՝ https://www.vnews.am/
