Արցախում այսօր ադրբեջանցիների ախորժակը զսպող միակ ուժը ռուսական սվիններն են, «Ազատության» հետ զրույցում ասաց լրագրող Թաթուլ Հակոբյանը:
Լրագրողը նկատեց՝ ռուսական սվինները պաշտպանում են ռուսական շահերը, բայց, եթե չլինեն ռուսական խաղաղապահները, Արցախում կարող է տեղի ունենալ կա՛մ արագ հայաթափում, կա՛մ ամենամեծ ողբերգությունը։ «Այսինքն՝ եկեք նաև իրատես լինենք», – ասաց Հակոբյանը։
Անդրադառնալով պնդումներին, թե ռուս խաղաղապահները պետք է հեռանան՝ Հակոբյանը շեշտեց՝ ուզում են ազատվել մի բանից, որի փոխարինողը չունեն։
Դիտարկմանը, թե նաև վարչապետն է քննադատում խաղաղապահներին՝ ասելով, որ նրանց թողտվությամբ ադրբեջանցիները երկու անգամ գրոհեցին Արցախի պաշտպանության բանակի դիրքերը, լրագրողն այսպես արձագանքեց․ – «Վարչապետ Փաշինյանի այդ քաղաքականությունը պարզ շանտաժ է, որին արդեն պարոն Լավրովը պատասխանել է։ Պարզ շանտաժ է։ Տեսեք՝ ինչ է տեղի ունենում՝ Հայաստանը մի կողմից հենց, որ Ադրբեջանը դառնում է սանձարձակ և գրոհում է Արցախի կամ Հայաստանի Հանրապետության ուղղությամբ, նույն օրը պարոն Փաշինյանն անմիջապես հեռախոսը վերցնում Պուտինին է զանգում, պարոն Արարատ Միրզոյանը հեռախոսը վերցնում Լավրովին է փնտրում, պաշտպանության նախարար Սուրեն Պապիկյանը Շոյգուին է փնտրում, Անվտանգության խորհրդի քարտուղար պարոն Գրիգորյանը Պատրուշևին է փնտրում, այսինքն՝ հրապարակային այս շանտաժի լեզուն են օգտագործում, դա մի լեզու է, որ ռուսների հետ աշխատելու, իմ կարծիքով, լավագույն լեզուն չէ։ Ես կարծում եմ, որ պետք է վերջ տալ այս ձևով աշխատելուն և պետք է ռուսների հետ այլ ձևով աշխատել, դա չաշխատող մեխանիզմ է», – ասաց Հակոբյանը։
Թաթուլ Հակոբյանի հետ հարցազրույցն ամբողջությամբ կարող եք դիտել ստորև
