Վայոց Ձորի Նոր Ազնաբերդ գյուղը խոշորացված Զառիթափ համայնքի մաս է կազմում:
Զառիթափ համայնքը կազմավորվել է ՀՀ վարչատարածքային բաժանման մասին ՀՀ օրենքում 2016 թվականի հունիսի 17-ին կատարված փոփոխության արդյունքում՝ Վայոց ձորի Արտավան, Բարձրունի, Գոմք, Խնձորուտ, Մարտիրոս, Նոր Ազնաբերդ, Սարավան, Սերս գյուղական համայնքների միավորումից և իր վարչական տարածքում ընդգրկում է Ախտա, Կապույտ, Ուղեձոր գյուղական բնակավայրերը։ Համայնքի կենտրոնը Զառիթափ (Փշոն, Փշոնք, Փաշալու, Ազիզբեկով) գյուղն է։
Ըստ Վայոց Ձորի մարզպետարանի կայքի, այսօր Նոր Ազնաբերդի բնակչության թիվը 160-ի շուրջ է: 1988թ. հայ-ադրբեջանական դեպքերից հետո այն վերաբնակեցվել է Նախիջևանի Ինքնավար Հանրապետության Զնաբերդ գյուղից Հայաստան փախած հայերով:
Գյուղի միջով հոսում են Ջահուկ և Լվիս կոչվող գետակները: Գյուղը սահմանակից
է Նախիջևանի Բզկով գյուղին, որի հետ ունի մոտ 5 կմ սահման, սահմանակից է նաև
մարզի Խնձորուտ և Սերս գյուղերին: Մարզկենտրոնից հեռու է 46կմ, ծովի
մակերևույթից բարձր է 1630մ: Գյուղը կրթական հաստատություն չունի, երեխաները հաճախում են հարևան Խնձորուտ գյուղի դպրոց:
Իթռղան անունով երկու բնակավայր է եղել՝ Վերին Իթղռան և Ներքին Իթղռան: 1905 թվականին Վայոց Ձորի ՀՅԴ զինական խումբը Առյուծ Ավագի հրամանատարությամբ ավազակաբարո բնակիչներին պատժելու նպատակով գրավել և հինովին ավերել է Ներքին Իթղռանը:
Գյուլստան/Գյուլիստան/Իթղռան/Վերին Իթղռան/Իթղռան Ամարաթ գյուղի բնակչությունը (աղբյուրը՝ Զավեն Կորկոտյան, “Խորհրդային Հայաստանի բնակչությունը վերջին հարյուրամյակում (1831-1931)”, ըստ տարիների, եղել է հետևյալը.
1831 թվական – 157 հոգի, բոլորը՝ իսլամ
1873 թվական – 257 հոգի, բոլորը՝ թաթար
1886 թվական – 364 հոգի, բոլորը՝ թաթար
1897 թվական – 235 հոգի (համառուսական՝ ցարական մարդահամար), բոլորը՝ իսլամ
1904 թվական – 490 հոգի
1914 թվական – 535 հոգի, ըստ Կովկասյան օրացույցի
1914 թվական – 539 հոգի, ըստ արխիվային տվյալների
1916 թվական – 442 հոգի
1919 թվական – տվյալներ չկան
1922 թվական – 103 հոգի, բոլորը՝ թրքո-թաթար
1926 թվական – 96 հոգի (ԽՍՀՄ առաջին մարդահամար), որից 88-ը՝ թուրք, 8-ը՝ քյուրդ
1931 թվական – 127 հոգի, բոլոր՝ թուրքական խումբ:
Պատրաստեց Թաթուլ Հակոբյանը
Կարդալ և դիտել նաև՝
https://www.aniarc.am/2017/12/31/vayk-1831-villages-population/
