Հայաստանի ֆուտբոլի ազգային հավաքականը այսօր, սեպտեմբերի 5-ին սկսում է նոր մրցափուլ ՈւԵՖԱ լիգայի շրջանակներում:
Նոր գլխավոր մարզիչ Խոակին Կապառոսի գլխավորությամբ սա մեր ազգային հավաքականի առաջին հանդիպումն է, և մենք իսպանացի մասնագետին մաղթում ենք հաջող մեկնարկ, իսկ Հայաստանին՝ հաղթական վերադարձ Հյուսիսային Մակեդոնիայից:
Առաջիկա երկու խաղերին չի մասնակցելու հավաքականի երկար տարիների անփոփոխ ավագ և առաջատար Հենրիխ Մխիթարյանը:
Հարգարժան Կապառոսի բացատրությունը, որ Հենրիխի՝ հավաքականին չմիանալը պայմանավորված է վատ մարզավիճակով, չի կարող արդարացված լինել անգամ, եթե մեր ավագը այդպես է հեռախոսով փոխանցել:
Հայկական ֆուտբոլի վաղվա օրվա՝ ակումբային ֆուտբոլի և մեր հավաքականի հաղթանակների նկատմամբ մեր ունեցած հավատն ու վստահությունը մեզ չի կարող անտարբեր թողնել: Մենք հավատում ենք, որ ամենաբարդ իրավիճակներում անգամ պետք է գտնել լուծումներ և ոչ թե աչք փակել ակնառու խնդիրների հանդեպ ու ներկայացնել արդարացումներ:
Անթույլատրելի շռայլություն է հավաքականի հետ չունենալ Հենրիխին՝ անկախ դրդապատճառներից:
Հայկական ֆուտբոլի նկատմամբ սրտացավությունը և հաղթանակների ծարավը մեզ բոլորիս պետք է ստիպեն ավելի լայնախոհ լինել, ֆուտբոլին չնայել մեր առանձնասենյակների նեղ պատուհաններից:
Անթույլատրելի է հայրենասիրության դասեր դասեր տալ մարդկանց, որոնք հայկական ֆուտբոլի, հետևաբար՝ Հայաստանի պատիվը հասցրել են անհավատալի թվացող բարձունքների ու մեզ բոլորիս հպարտություն ներշնչել:
Հայրենասիրությունը սկսվում է մեր ընտանիքներից: Եթե մենք չենք հարգում մեր ծնողներին, մենք չենք կարող սիրել մեր մեծ ընտանիքը՝ Հայաստանը:
Հուսով ենք, որ երկխոսությունն ու բանականությունը կհաղթեն եսասիրությանն ու անբացատրելի համառությանը, և Հենրիխ Մխիթարյանը օր առաջ կմիանա Հայաստանի մեծ ֆուտբոլային ընտանիքին:
Այսօր, մի քանի ժամ անց, Հայաստանը սկսում է նոր մրցափուլ: Հաջողություն մաղթենք նոր գլխավոր մարզչին, իսկ Հայաստանին՝ հաղթական վերադարձ:
Թաթուլ Հակոբյան, լրագրող, «Դովեղ» ֆուտբոլային ակումբ ՀԿ
Տիգրան Հակոբյան, «Էրեբունի-Դիլիջան» ֆուտբոլային ակումբի նախագահ
