Սա Արցախի Քաշաթաղ շրջանի ազատագրուած Վան գիւղի դպրոցն է, որուն շինարարարական եւ նորոգման աշխատանքները սկսանք ամիսներ առաջ՝ Թուֆէնքեան հիմնադրամի եւ այլ բարերարներու տրամադրած միջոցներով: Շուտով աւարտին պիտի հասնի ոչ միայն դպրոցի, այլեւ անոր մօտիկ գտնուող այլ կառոյցի մը՝ ուսուցիչներու տան շինարարութիւնը:
Բազմաթիւ երեխաներ դպրոցական նոր տարին պիտի դիմաւորեն նորոգուած դպրոցի փայլուն դասարաններու մէջ, մաքուր զուգարաններով եւ սրահներով: Իսկ Հայաստանէն եւ Արցախէն եկած ուսուցիչներ պիտի տեղաւորուին նորակառոյց տան մէջ եւ իրենց գիտելիքը պիտի փոխանցեն ազատագրուած տարածքի նորաբնակներու երեխաներուն:
Ազատագրուած հայրենիքը պիտի վերականգնենք քար առ քար՝ ամէնօրեայ տքնաջան աշխատանքով եւ մեր հայրենիքի ու ժողովուրդի հանդէպ ունեցած հաւատքով:
Սա մեր ճանապարհն է, մեր հաւատամքը: Ազատագրուած Հայրենիքը կը պահեն ու կը զարգացնեն ամէնօրեայ գործով:
Րաֆֆի Տուտագլեան
