Վահան Մինախորեան, 1915 թւականը. Արհավիրքի օրեր, Թեհրան, 2006
Վահան Մինախորյանը գրում է, որ Էրզրումի ՀՅԴ Ութերորդ Ընդհանուր ժողովից անմիջապես հետո թուրք ոստիկանները սկսում են հետապնդել, լրտեսել և ձերբակալել ժողովին մասնակից պատվիրակներին:
Յաջորդ օրը ճաշարանում ինձ եւ Ակնունուն ձերբակալեց մի ոստիկան: Ակնունին վրդովւած էր եւ որովհետեւ թուրքերէն բոլորովին չգիտէր՝ պահանջում էր հասկանալ, թէ ում կարգադրութեամբ էր մեզ ձերբակալում: Պարզւեց, որ մեզ տանում էր ոստիկանապետի կարգադրութեամբ:
Ակնունին բարկութիւնից կարմրեց.
– Թող մեզ նախապէս առաջնորդի Բեհաէդդին Շաքիրի մօտ:
Ոստիկանը այդ անունը լսելուն պէս՝ սմքեց ու խոնարհութեամբ հնազանդւեց:
Լուռ քայլեցինք մինչեւ ոստիկանանատուն: Այստեղ նա մեզ առաջնորդեց մի երկար սենեակ: էջ 90
Դուռը , կողպեց՝ յայտնելով, որ պէտք է գնայ՝ ոստիկանապետին զեկուցի: Նստել էի պատուհանի տակ եղած մի նեղ, մերկ թախտի վրայ: Ակնունին դեռ բորբոքւած անցուդարձ էր անում: Ըստ հին սովորութեան՝ ինքս ինձ հարցաքննում էի… Ի՞նչ… Հ. Յ. Դաշնակցութեան Ընդհանուր ժողովը… Գաղտնի՞ք էր, դաւադրութի՞ւն: Ո՞վ խնդրեց այդ ժողովը գումարել Էրզրումում. նոյնինքն Թալէաթ փաշան: էջ 91
Դէպի ձախ, անկիւնում, մի փոքրիկ սեղանի մօտ, կանգնած էր Եղիշէ էֆենդին, Էրզրումի միակ հայ թաղային ոստիկանապետը, որ սեր-կոմիսարի աստիճան ունէր: էջ 92
Ակնունին շատ մեծ հաւատ ունէր Կենտրոնում ունեցած իր կապերի, յատկապէս Թալէաթի հետ հաստատւած բարեկամութեան վրայ: Ընկերները թերահաւատ էին, բայց ոչ՝ ժխտական. նրանց կարծիքով ՝ անհրաժեշտ էր տեղում հակազդել: Մէկը միւսին չէր հակասում: Ակնունին ֆրանսերէն մի հեռագիր կազմեց Թալէաթին ուղղւած՝ Դագէսեանի, իմ եւ իր ձերբակալութեան մասին՝ յայտնելով իր բուռն բողոքը: էջ 97
Ծանթագրություն. Ակնունին իսկական անունով Խաչատուր Մալումյանն է (1863-1915): Ծնվել է Մեղրիում, սովորել է Ներսիսյան դպրոցում, ապա՝ Ժնևում: ՀՅԴ անդամ: Սերտ հարաբերություններ է ունեցել Երիտթուրքերի, մասնավորապես՝ Թալեաթի հետ: Մասակցել է ՀՅԴ Ութերորդ Ընդհանուր ժողովին՝ 1914 թ. ամռանը Կարինում՝ Էրզրում: Սպանվել է երիտթուրքերի ձեռքով՝ 1915-ին՝ Այաշից Դիարբեքիր աքսորի ճանապարհին:
