Հայկական ուսումնասիրությունների ԱՆԻ կենտրոնը այսօր, փետրվարի 21-ին, Ստեփանակերտում, կազմակերպությամբ Արցախի Ժուռնալիստների միության, նախաձեռնել էր Արտաշես Վրույրի «Անիում» աշխատության երրորդ հրատարակության և անգլերեն հատորների շնորհանդեսը:
Միջոցառմանը ներկա էին լրագրողներ, գրողներ, պատմաբաններ, հասարակական-քաղաքական գործիչներ Ստեփանակերտից, Շուշիից, Ասկերանից, Հադրութից:
Միջոցառումը տեղի ունեցավ Արցախի Ժուռնալիստների միության հարկի տակ: Այն բացեց միության նախագահ, գրող և լրագրող Կիմ Գաբրիելյանը: Խոսք ասացին պատմաբան Մհեր Հարությունյանը, գրող և լրագրող Դավիթ Միքայելյանը, լուսանկարիչ Վալերի Պետրոսյանը:
Գիրքը ներկայացրեց ԱՆԻ կենտրոնի համակարգող Թաթուլ Հակոբյանը և պատասխանեց ներկաների հարցերին:
Այս գիրքը Բագրատունյաց չքնաղ մայրաքաղաք Անիի վերջին բնակիչների և վերջին վանահոր՝ Հայր Միքայելի մասին է: Հայրենիքին նվիրյալ այս հոգևորականը, որ ծնունդով Արցախից էր, վերջիններից մեկը լքեց Անին, երբ 1918-ի ապրիլին թուրքական զորքերը գրավեցին ավերակների քաղաքը:
Շնորհանդեսի ավարտին Արցախի Ժուռնալիստների միությունը ներկաներին հյուրասիրեց Արցախի գինի և ժենգյալով հաց:
Հայկական ուսումնասիրությունների ԱՆԻ հիմնադրամ
21 փետրվար, 2020, ք. Ստեփանակերտ, Արցախ
Լուսանկարը՝ Արմեն Հակոբյանի
