Սահմանադրական դատարանի շուրջ ստեղծված իրավիճակը հաղթահարելու իշխանությունների ձեռնարկած քայլերը քաղաքական են, հակասահմանադրական և ապօրինի։
Առաջին ապօրինությունը թույլ է տվել Ազգային ժողովը՝ 75 կողմ և 34 դեմ ձայներով, երկրորդ ընթերցմամբ և ամբողջությամբ ընդունելով Սահմանադրական դատարանի դատավորների վաղ կենսաթոշակային համակարգի ներդրման օրենքի նախագիծը:
ՍԴ նախագահ Հրայր Թովմասյանը, որն ապօրինի ճանապարհով է դարձել այդ կառույցի ղեկավար՝ վարձատրվելով Սերժ Սարգսյանից՝ իր ապօրինությունների համար, ոտք է դեմ տվել Նիկոլ Փաշինյանի իշխանությանը և չի ուզում հեռանալ։ Թովմասյանը երկու սահմանադրություն գրելու պատվեր է կատարել՝ փորձելով հավերժացնել Սերժ Սարգսյանի իշխանությունը Հայաստանում և Բակո Սահակյանինը՝ Արցախում։
2018-ի ապրիլին Թավշյա հեղափոխությունը խափանեց Թովմասյանի, իշխող ՀՀԿ-ի ու Սերժ Սարգսյանի հանցավոր մտահաղացումը։
Բայց մենք քննարկման թեմա չենք դարձնում և կասակածի տակ չենք դնում Թովմասյանի, ՀՀԿ-ի ու Սերժ Սարգսյանի սահմանադրական ապօրինությունները։ Մենք մեր մտահոգություններն ենք հայտնում այն ապօրինությունների առնչությամբ, որ թույլ է տալիս Ազգային ժողովը, նախագահ Արմեն Սարգսյանը և Նիկոլ Փաշինյանի իշխանությունը՝ փորձելով քաղաքական, հակասահմանադրական և ապօրինի ճանապարհով ազատվել Սերժ Սարգսյանի ու Ռոբերտ Քոչարյանի վերջին բաստիոնից։
Անհասկանալի է նաև, թե ինչու է Հրայր Թովմասյանը ցանկանում «նահատակվել» Սերժի ու Քոչարյանի համար։ Եթե, իրավամբ, պարոն Թովմասյանի համար օրենքն է առաջնային, ապա ինչու էր ապօրինություններ թույլ տալիս Սերժի ժամանակ։
Հետևաբար, պարոն Թովմասյանի վարքագիծը և մարտավարությունը ևս քաղաքական է։
Երկրորդ ապօրինությունը թույլ տվեց նախագահ Արմեն Սարգսյանը՝ հաստատելով Սահմանադրական դատարանի դատավորների վաղ կենսաթոշակային համակարգի ներդրման օրենքի նախագիծը:
«Բարի պապիկը» չի ուզում հրաժարվել «անգլիական թագուհու» կարգավիճակից։
Երրորդ ապօրինությունն այն է, որ պետական բյուջեի, այսինքն՝ հարկատուների հաշվին, Հայաստանի իշխանությունները թոշակի են ուղարկում մարդկանց, որոնք գուցե պետք է կանգնեին արդարադատության առաջ։ Պետությունը, ըստ էության, կաշառում է մի քանի ընտրություններում կեղծիքը օրինականացրած մարմնի անդամներին, ընդ որում՝ կաշառում է հարկատուների հաշվին՝ փորձելով ապօրինի ճանապարհով պատվավոր թոշակի ուղարկել նրանց։
Իրավական պետության տեսակետից սա անթույլատրելի քայլ է՝ մեղմ ասած։
Թաթուլ Հակոբյան
