Այսօր, դեկտեմբերի 11-ին, Դովեղ ֆուտբոլային ակումբի հիմնադիր Թաթուլ Հակոբյանը մեկ ժամ տևողությամբ հանդիպում է ունեցել ՀՖՖ փոխնախագահ և գլխավոր քարտուղար Արմեն Մելիքբեկյանի հետ՝ վերջինիս առաջարկով։
Հանդիպման ընթացքում քննարկվել են Հայաստանի ֆուտբոլի մանկապատանեկան առաջնության հետ կապված խնդիրներ, այդ թվում Դովեղ ակումբի գործունեության, ինչպես նաև՝ դեկտեմբերի 23-ին կայանալիք ՀՖՖ նախագահի և գործկոմի անդամների ընտրությունների հետ կապված հարցեր։
Արմեն Մելիքբեկյանը ՀՖՖ նախագահի երեք թեկնածուներից է (մյուս երկուսը՝ հայ նշանավոր ֆուտբոլիստ Խորեն Հովհաննիսյան և Լոռի ՖԱ-ի հիմնադիր Թովմաս Գրիգորյան)։
Դեկտեմբերի 23-ին կայանալու է նաև ՀՖՖ նոր գործկոմի ընտրությունը, որի համար առաջադրվել են 24 թեկնածուներ։
Արխիվային լուսանկար՝ ՀՖՖ ղեկավարությունը Նոյեմբերյանի քաղաքային մարզադաշտում, 2019 թ․ ապրիլ
—————–
Ի գիտություն
Դովեղ ֆուտբոլայի ակումբ ՀԿ-ն, որ հիմնադրվել է 2018-ի մարտին, չի առաջադրել ՀՖՖ նախագահի կամ գործկոմի անդամի թեկնածու, ինչի հնարավորությունը ունեցել է, ինչպես մյուս ակումբները:
Դովեղ ՖԱ ՀԿ-ն մեկ ձայնի իրավունքով մասնակցելու է դեկտեմբերի 23-ի արտահերթ ժողովին և քվեարկելու է (կամ չի քվեարկելու) ՀՖՖ նախագահի երեք թեկնածուներից և գործկոմի անդամության 24 թեկնածուներից որևէ մեկի օգտին:
Կարևորելով թափանցիկությունն ու նոր մշակույթի ներդրումը հայկական ֆուտբոլում՝ տեղեկացնում ենք, որ մինչև 22-ը ներառյալ պատրաստ ենք հանդիպել ՀՖՖ նախագահի բոլոր երեք և գործկոմի անդամության բոլոր 24 թեկնածուներին՝ պայմանով, որ
ա. Այդ ծանոթություն/հանդիպում/զրույց/քննարկումները չեն կարող լինել գաղտնի կամ խորհրդապահական,
բ. Այդ հանդիպումների մասին պետք է տրվի տեղեկատվություն լրատվամիջոցում/ներում կամ ակումբի ու անձնական ֆեյսբուքում` առնվազն մեր կողմից:
Դովեղ ֆուտբոլային ակումբ ՀԿ
11 դեկտեմբեր, 2019
