Հայկական ուսումնասիրությունների ԱՆԻ կենտրոնը դեկտեմբերի 6-ին Սյունիքի մարզկենտրոն Կապանում կազմակերպել էր հանդիպում-քննարկում «Հայ-ռուսական շփումները և Հայաստանի խորհրդայանացումը 1920թ դեկտեմբերին» թեմայով:
Հանդիպումը կայացավ Սյունիքի մարզային գրադարանում։
Հայաստանի Հանրապետությունը հռչակվեց 1918 թվականի մայիս-հունիս ամիսներին՝ ընդամենը 10-11 հազար քառակուսի կիլոմետր տարածքի վրա՝ Արարատյան դաշտում և Սևանի ավազանում:
Հայաստանի և Օսմանյան կայսրության միջև հունիսի 4-ին Բաթում կնքված Հաշտության և բարեկամության պայմանագրով գծվում է երկու երկրների միջև սահմանը, մինչդեռ Հայաստանի և Ադրբեջանի, Հայաստանի և Վրաստանի, Ադրբեջանի և Վրաստանի սահմանները մնում էին վիճելի, որոնք էլ հետագայում պատճառ դարձան հայ-վրացական, հայ-ադրբեջանական և վրաց-ադրբեջանական բախումների և պատերազմների 1918-1920 թվականներին և ապագայում:
Հայաստանի և Ադրբեջանի միջև կային մի շարք վիճելի շրջաններ, որոնցից առանցքային երեքը Արցախը, Զանգեզուրը և Նախիջևանն էին։ Երկու հանրապետութոյւնները հավակնություններ ունեին այլ հողաշերտերի նկատմամբ ևս, որի պատճառով ռազմական բախումներ եղան նաև Տավուշ-Ղազախ հատվածում։
Երբ 1920թ ապրիլին Ադրբեջանը դարձավ բոլշևիկյան, Ռուսաստանը սկսեց բացահայտ օգնել նրան՝ ընդդեմ Հայաստանի:
Հայաստանի կառավարությունը Մոսկվա ուղարկեց պատվիրակություն, որը գլխավորում էր խորհրդարանի փոխնախագահ Լևոն Շանթը:
Հայ-ռուսական բանակցությունների, Հայաստան-Ադրբեջան վիճելի շրջանների, պատերազմի և դիվանագիտության, 1920թ օգոստոսի 10-ին Թիֆլիսում ստորագրված հայ-ռուսական համաձայնագրի մասին խոսեց ԱՆԻ կենտրոնի համակարգող, լրագրող Թաթուլ Հակոբյանը, որին հետևեց հարց ու պատասխան և քննարկում:
ԱՆԻ հիմնադրամի 12 թեմատիկ դասախոսությունները հնարավոր է դարձել իրականացնել Բաց հասարակության հիմնադրամներ-Հայաստան կազմակերպության տրամադրած դրամաշնորհի շրջանակներում։
Հունիսի 20-ին Բաց հասարակության հիմնադրամներ-Հայաստանը բավարարել է ԱՆԻ-ի դիմումը և հիմնադրամի հետ ստորագրել 4.8 միլիոն դրամ (10 հազար ԱՄՆ դոլար) տրամադրելու պայմանագիր:
Նախքան Կապանի միջոցառումը ԱՆԻ հիմնադրամը այս ծրագրի շրջանակներում քննարկումներ է կազմակերպել Աշտարակում, Արտաշատում, Գյումրիում, Վանաձորում և Իջևանում:
Հայկական ուսումնասիրությունների ԱՆԻ կենտրոն
Հայ-ռուսական շփումները և Հայաստանի խորհրդայնացումը 1920թ դեկտեմբերին. ԱՆԻ-ի քննարկումը Կապանում
