Հայկական ֆուտբոլի հարգարժան ներկայացուցիչներ, ՀՖՖ նախագահի և գործկոմի անդամության թեկնածուներ, մարզական լրագրողներ, ֆուտբոլիստներ, ֆուտբոլասերներ…
Այսօրվանից սկսած մինչև դեկտեմբերի 23-ը՝ ՀՖՖ նախագահի և գործկոմի անդամների ընտրությունները, ես, լինելով լրագրող և Դովեղ ֆուտբոլային ակումբ հասարակական կազմակերպության հիմնադիր, որևէ կերպ չեմ անդրադառնալու այդ ընտրություններին, ՀՖՖ նախագահի երեք և գործկոմի անդամության 24 թեկնածուների գործունեությանը ինչպես լրատվամիջոցներում, այնպես էլ սոցիալական ցանցերում:
Այս կերպ ես կփորձեմ պահել իմ անաչառությունը և վնաս կամ օգուտ չհասցնել նախագահի կամ գործկոմի անդամության թեկնածուներին՝ հայկական ֆուտբոլի համար այս զգայուն պահին:
Մեր ակումբը չի առաջադրել ՀՖՖ նախագահի կամ գործկոմի անդամի թեկնածու, ինչի հնարավորությունը ունեցել ենք, ինչպես մյուս ակումբները:
Մենք մեկ ձայնի իրավունքով մասնակցելու ենք դեկտեմբերի 23-ի արտահերթ ժողովին և քվեարկելու ենք (կամ չենք քվեարկելու) ՀՖՖ նախագահի երեք թեկնածուներից և գործկոմի անդամության 24 թեկնածուներից որևէ մեկի օգտին:
Հասկանալի և տրամաբանական է ՀՖՖ նախագահի և գործկոմի անդամության թեկնածուների ցանկությունը հանդիպել և զրուցել այն երեք տասնյակ ակումբերի ղեկավարների հետ, որոնց քվեարկությունից է կախված նրանց ընտրությունը:
Կարևորելով թափանցիկությունն ու նոր մշակույթի ներդրումը հայկական ֆուտբոլում՝ սիրով տեղեկացնում եմ, որ դեկտեմբերի 9-ից մինչև 22-ը ներառյալ պատրաստ եմ հանդիպել ՀՖՖ նախագահի բոլոր երեք և գործկոմի անդամության բոլոր 24 թեկնածուներին՝ պայմանով, որ
ա. Այդ ծանոթություն/հանդիպում/զրույց/քննարկումները չեն կարող լինել գաղտնի կամ խորհրդապահական,
բ. Այդ հանդիպումների մասին պետք է տրվի տեղեկատվություն լրատվամիջոցում/ներում կամ ակումբի ու անձնական ֆեյսբուքում` առնվազն մեր կողմից:
Հարգանքներով և բարեկամաբար՝
Թաթուլ Հակոբյան
ՍիվիլՆեթի լրագրող, ԱՆԻ կենտրոնի համակարգող և Դովեղ ՖԱ-ի հիմնադիր
