Խստիվ դատապարտում ենք ՀՀ ԱԳՆ գլխավոր քարտուղարի քայլը և պահանջում ենք ՀՀ ԱԳՆ նախարարի և Սփյուռքի գործերով գլխավոր հանձնակատարի գնահատականը:
ՀՀ ԱԳՆ ԳԼԽԱՎՈՐ ՔԱՐՏՈՒՂԱՐ ՎԱՀԱԳՆ ՄԵԼԻՔՅԱՆՆ ԱԹԵՆՔՈՒՄ ՀԱՆԴԻՊԵԼ Է ՄԻԱՅՆ ՀՅԴ ԱՆԴԱՄՆԵՐԻՆ
Աթենքում ՀՀ արտաքին գործերի նախարարության գլխավոր քարտուղար Վահագն Մելիքյանը, Հունաստանի ԱԳ նախարարի տեղակալի հետ հանդիպումից հետո, ՀՀ արտակարգ և լիազոր դեսպան Ֆադեյ Չարչօղլեանի ուղեկցությամբ հանդիպել են ՀՅԴ Հունաստանի կենտրոնական կոմիտեի հետ:
Հանդիպումը տեղի է ունեցել երկուշաբթի, հունիսի 17-ի երեկոյան: Վահագն Մելիքյանը և Ֆադեյ Չարչօղլեանը ՀՅԴ Հունաստանի կենտրոնական կոմիտեի նստավայրում շուրջ երկու ժամ բովանդակալից զրույց են ունեցել ՀՅԴ անդամների հետ:
Քննարկել են Հայաստանի արտաքին քաղաքականության հետ կապված խնդիրներ, խոսել են Արցախի հիմնահարցի և Հայ Դատի հետապնդման աշխատանքների, միջազգային հարթակներում Հայաստանի, Արցախի և հայ ժողովուրդի շահերը ներկայացնելու մասին: ՀՅԴ-ի հրապարակած հայտարարության համաձայն, նրանք կարծիքներ են փոխանակել նաև Հայաստանի ներքին քաղաքական կյանքի վերաբերյալ:
ՀՀ ԱԳՆ գլխավոր քարտուղար Վահագն Մելիքյանը հայ համայնքում գործող ոչ մի այլ կազմակերպության կամ կուսակցության հետ հանդիպում չի ունեցել:
Դեսպան Ֆադեյ Չարչօղլեանը 2018թ․ ապրիլ-մայիսյան Համաժողովրդային շարժման օրերին հնարավոր բոլոր միջոցներով խոչնդոտել է շարժմանը սատարող հայ համայնքի ներկայացուցիչներին և կազմակերպություններին` բացահայտ թշնամանք դրսևորելով: Այս ամենի մասին բազմիցս եղել են հրապարակումներ Հայաստանի և Սփյուռքի մամուլում:
Թերևս, զարմանալի չէ դեսպանի այսօրինակ վարքագիծը, նա, բնական է, հեռանալուց առաջ իր մաղձն է թափում հայ համայնքի վրա: Զարմանալի չէ նաև Հունաստանի դաշնակցականների կեցվածքը, որոնք արհամարելով համայնքի ցանկություններն ու ձգտումները 2018 թ․-ի ապրիլ-մայիսին բացահայտ պաշտպանում էին ՀՀ նախկին կոռուպցիոն իշխանություններին:
Անհասկանալին ՀՀ ԱԳՆ գլխավոր քարտուղար Վահագն Մելիքյանի պահվածքն է, որ Նոր Հայաստանի պայմաններում, շարունակում է դրսևորել հին իշխանություններին հատուկ խտրական և վնասաբեր գործելաոճը` վնասելով Հայաստանին, Սփյուռքում խորացնելով առանց այդ էլ քայքայված հայ համայնքի պառակտումը։
Մենք խստիվ դատապարտում ենք ՀՀ ԱԳՆ գլխավոր քարտուղար Վահագն Մելիքյանի քայլը և պահանջում ենք ՀՀ ԱԳՆ նախարարի և Սփյուռքի գործերով գլխավոր հանձնակատարի գնահատականը այսօրինակ գործողությունների նկատմամբ:
Հայկական ժողովրդային Շարժում
Սոցիալ դեմոկրատ Հնչակյան կուսակցություն
Հայ- հունական ուսումնասիրությունների կենտրոն
«Հայաստան» հասրակական մշակութային կենտրոն
Աթենք, 20 հունիսի 2019թ․
