Հայաստանի ֆուտբոլի ֆեդերացիայի (ՀՖՖ) կարգապահական կոմիտեի նոյեմբերի 15-ի նիստում «Շիրակ» ֆուտբոլային ակումբը տուգանվել է 100 հազար դրամով:
Ակումբը 50 հազար դրամով տուգանվել է ՀՀ ֆուտբոլի Բարձրագույն խմբի 2018-2019 թթ. առաջնության «Շիրակ»-«Արարատ-Արմենիա» խաղի տեսագրությունը ՀՖՖ սահմանված ժամկետից ուշ ներկայացնելու համար: Եվս 50 հազարով ակումբը տուգանվել է նույն խաղում հետևյալ պատճառով. տեղադրված կողային տեսախցիկները չեն եղել յուրաքանչյուր կիսադաշտի տուգանային հրապարակի գծի ուղությամբ:
Ավելի վաղ, նոյեմբերի 13-ին «Շիրակ» ֆուտբոլային ակումբի նախագահ Արման Սահակյանը բաց նամակ էր հղել Հայաստանի ֆուտբոլի ֆեդերացիային՝ դժգոհելով մրցավարության կողմնակալ պահվածքից՝ նկատի ունենալով նույն «Շիրակ»-«Արարատ-Արմենիա» խաղը, որն ավարտվել էր գյումրեցիների հաղթանակով՝ 1-0 հաշվով:
Սահակյանը ՀՖՖ-ից խնդրել էր «Շիրակի» և երևանյան թիմերի միջև հանդիպմանը չնշանակել մրցավարական անձնակազմ ոչ Երևանից, ոչ էլ Գյումրիից:
«Շիրակ»-«Արարատ-Արմենիա» խաղից հետո «Շիրակ» ֆուտբոլային ակումբը իր Ֆեյսբուքի էջում տեղադրել էր տեսանյութ, որտեղ մրցավարի կողմից ակնհայտ գոլը չի հաշվվում, ինչպես նաև վտանգավոր գոտում «Շիրակ»-ի դեմ տուգանային հարված է «հորինվում»: Բացի այդ, ակումբը անհասկանալի էր որակել գլխավոր մրցավարի կողմից խաղավերջում 5 րոպե ավելացնելը, երբ խաղի ընթացքում զգալի դադարներ չէին եղել:
«Շիրակ»-«Արարատ-Արմենիա» խաղը սպասարկել էր մրցավարական հետևյալ անձնակազմը.
| Մրցավար` | Սուրեն Բալիյան (Երևան) |
| Մրց. 1-ին օգն.` | Էրիկ Արևշատյան (Երևան) |
| Մրց. 2-րդ օգն.` | Խաչատուր Հովհաննիսյան (Երևան) |
| 4-րդ պ-նյա` | Արթուր Ալեքսանյան (Երևան) |
| Տեսուչ` | Կարեն Նալբանդյան (Երևան) |
| Մրց. 1-ին լր. օգն.` | Աշոտ Ղալթախչյան (Իջևան) |
| Մրց. 2-րդ լր. օգն.` | Շահեն Աղայան (Կապան) |
Դիտել նաև՝
