Հայաստանի երրորդ նախագահ Սերժ Սարգսյանի և նրա գլխավորած Հանրապետական կուսակցության հետագա իշխանավարման դեմ պայքարը գլխավորող Նիկոլ Փաշինյանը ապրիլի 27-ին, ժամը 12:00-ին վարչապետի պաշտոնակատար, ՀՀԿ փոխնախագահ Կարեն Կարապետյանին հարվիրում է «Մարիոթ» հյուրանոց՝ սկսելու բանակցային գործընթացի երկրորդ փուլը, հաղորդում է Ազատությունը:
«Բանակցությունների նախորդ փուլը ձախողվեց հետևյալ պատճառով․ երբ ես պատրաստվում էի հանդիպել Կարեն Կարապետյանի հետ, կային հանրապետականներ, ովքեր ասում էին, որ Կարեն Կարապետյանը չի ներկայացնում իրենց: Երեկ իրենք կուսակցական ժողով են արել Սերժ Սարգսյանի մասնակցությամբ, և ի վերջո եկել են ընդհանուր հայտարարի, որ պետք է Կարեն Կարապետյանին լիազորեն, որպեսզի բանակցի», – մանրամասնեց Փաշինյանը՝ հավելելով, որ ՀՀԿ-ի այդ որոշումը ընդունում են ի գիտություն:
«Ինչպես և նախկինում, պատրաստակամություն ենք հայտնում շարունակել բանակցային գործընթացը մեր առաջարկած օրակարգի շրջանակներում և ես վաղը ժամը 12:00-ին Կարեն Կարապետյանին հրավիրում եմ «Մարիոթ» հյուրանոց՝ սկսելու բանակցային գործընթացի երկրորդ փուլը», – շարունակեց Փաշինյանը:
Ընդդիմադիր գործիչը ընդգծեց, որ բանակցությունների համար ունի մեկ կոնկրետ պայման՝ այն պետք է տեղի ունենա լրագրողների մասնակցությամբ՝ «որպեսզի հանրություն տեղյակ լինի, թե ինչ ենք քննարկում»:
«Մենք Հանրապետականի հետ փակ դռների հետևում չենք բանակցելու, մենք բանակցելու ենք ժողովրդի աչքի առաջ, որովհետև մենք հայտարարում ենք, որ ժողովուրդը իշխանություն է, ժողովուրդը մեր ղեկավարն է, ժողովուրդը մեր շեֆն է և մենք մեր ղեկավարին պետք է հաշվետու լինենք մեր արած ամեն քայլի համար», – հավելեց նա:
