«Ո՛չ հայկական օկուպացիայի օրինականացմանը»` բողոքի ցույց Թբիլիսիում. ԱԼԻՔ Մեդիա
«Ոչ հայկական օկուպացիայի օրինականացմանը», սա էր օգոստոսի 31-ին «Վրաց ազգայնական մշակույթ» կազմակերպության կողմից կազմակերպված ցույցի գլխավոր կարգախոսն ու ուղերձը:
Ցույցը տեղի ունեցավ Թբիլիսիում` Վրաստանի կառավարության շենքի հարակից տարածքում: Ակցիայի կազմակերպիչներից Գիորգի Ճելիձեն ելույթի ժամանակ հայտարարեց, թե Վրաստանի կառավարությունը շարունակաբար հարևան երկրներին է հանձնում Վրաստանի տարածքները:
«Այժմ հերթը հասել է Խուճապի վանքին և նրա հարակից անտառին: Մենք արտգործնախարարությունից պատասխան ենք ստացել որ, այո, իրականում դեմարկացիայի գործընթաց է ընթանում, ըստ որի Խուճապի վանքն ու նրան հարակից տարածքները 
մտնում են Հայաստանի Հանրապետության կազմի մեջ: Դա ոչ միայն ամբողջությամբ սուտ է, այլև դավաճանություն: Այլ կերպ չի կարելի կոչել այն, որ մեր կառավարությունը որոշումներ է ընդունում հենվելով Խորհրդային Միության կողմից գծաց քարտեզի վրա, այն երկրի քարտեզի, որն օկուպացրել է մեր երկրի տարածքը»:
Խոսելով Ալիք մեդիայի հետ Ճելիձեն նշեց բողոքի ցույցի նպատակը. «Սա բացառապես զգուշացնող ակցիա էր: Մեր նպատակն էր կառավարությանը զգուշացնել, որ նման քայլի չդիմի և չշարունակի սկսած քաղաքականությունը»:
Շուրջ 15 րոպե տեւած ակցիային մասնակցեց 25-30 ցուցարար, որը սակայն որեւէ վրացալեզու մամուլի միջոց չէր լուսաբանում:
Աղաբեկ Սիմոնյան
Աղբյուրը՝ Ալիք մեդիա
Լուսանկարում՝ Խուճապի վանքը ՀՀ Լոռու մարզում՝ Հայաստան-Վրաստան սահմանին
Կարդալ նաև՝
