factor.am-ը գրավոր հարցմամբ դիմել էր ՀՀ պաշտպանության նախարարությանը՝ ներկայացնելով ՀՀ ներկա և նախկին բաձրաստիճան 48 պաշտոնյաների զավակների ցուցակ և խնդրելով տեղեկացնել, թե նրանցից ով և որտեղ է պարտադիր զինվորական ծառայություն անցել։
Պաշտոնյաների զավակներից բացի բանակում չեն ծառայել նաև բազմաթիվ պաշտոնյաներ: Ազգային ժողովի փոխնախագահ Էդուրադ Շարմազանովը, ով բանակում չի ծառայել, իշխող ՀՀԿ-ի առաջնորդներից է և կուսակցության խոսնակը։
Հայկական բանակում չծառայելը չի խանգարել, որ Շարմազանովն արժանանա «Գարեգին Նժդեհ» և «Անդրանիկ Օզանյան» մեդալների և «ԵԿՄ 20-ամյակ» հուշամեդալի։
Ներկայացնում ենք նրա ամբողջական կենսագրությունը, ինչպես այն ներկայացված է քաղաքապետարանի Ազգային ժողովի կայքում:
Էդուարդ Հովսեփի Շարմազանով
Ծնվել է 1975թ. նոյեմբերի 8-ին Ալավերդիում:
1997թ. ավարտել է Խ.Աբովյանի անվան ՀՊՄԻ պատմաաշխարհագրական ֆակուլտետի պատմության բաժինը, 2000թ.` ՀՊՄԻ հայոց պատմության ամբիոնի ասպիրանտուրան, 2006թ.` Եվրոպայի խորհրդին կից Մոսկվայի քաղաքական հետազոտությունների դպրոցը: Մանկավարժական գիտությունների թեկնածու:
1995թ. հիմնադրել է Ալավերդու «Զարթոնք» ուսանողական միությունը:
1997-1999թթ. եղել է ՀՊՄԻ ուսանողական գիտական ընկերության ղեկավար:
1999-2002թթ. աշխատել է թիվ 159 կրթահամալիրի ուսուցիչ:
2002-2005թթ. եղել է ՀՊՄԻ ուսանողական խորհրդի նախագահ, ռեկտորի օգնական, ՀՊՄՀ հայոց պատմության ամբիոնի դասախոս, ՀՀԿ երիտասարդական կազմակերպության փոխնախագահ:
2005թ. մայիսին առաջադրվել է Ալավերդու քաղաքապետի թեկնածու, 2005-2007թթ. եղել է ՀՀ վարչապետի օգնական: 2013 թվականից ԵՊՀ միջազգային հարաբերությունների ֆակուլտետի քաղաքական ինստիտուտների եւ գործընթացների ամբիոնի դոցենտ է:
2007-2012թթ.` Ազգային ժողովի պատգամավոր (համամասնական ընտրակարգ, ՀՀԿ): 19.06.2007-11.07.2008թթ.` Ազգային ժողովի եվրոպական ինտեգրման հարցերի մշտական հանձնաժողովի անդամ, 11.07.2008-06.12.2011թթ.` Ազգային ժողովի սոցիալական հարցերի մշտական հանձնաժողովի անդամ: 06.12.2011-31.05.2012թթ.` ՀՀ Ազգային ժողովի նախագահի տեղակալ: «Հայաստանի Հանրապետական կուսակցություն» խմբակցության անդամ: ՀՀԿ մամուլի խոսնակ:
2012-2017թթ.՝ ԱԺ պատգամավոր (համամասնական ընտրակարգ, ՀՀԿ): ՀՀ Ազգային ժողովի նախագահի տեղակալ: «Հանրապետական» (ՀՀԿ) խմբակցության անդամ: ՀՀԿ մամուլի խոսնակ:
2017թ. ապրիլի 2-ին ԱԺ պատգամավոր է ընտրվել ՀՀԿ համապետական ընտրական ցուցակով:
2017թ. մայիսի 19-ին ընտրվել է Հայաստանի Հանրապետության Ազգային ժողովի նախագահի տեղակալ:
Պարգեւատրվել է ՀՀ վարչապետի շնորհակալագրով եւ մրցանակով (2003թ.), «Հայկյան» մրցանակով («Ուսանողական ինքնակառավարման մարմնի լավագույն ղեկավար» անվանակարգ, 2005թ.), «Գարեգին Նժդեհ» (2006թ., ՊՆ), «Անդրանիկ Օզանյան» (2008թ., ՊՆ) մեդալներով, «Ֆրիտյոֆ Նանսեն» ոսկե հուշամեդալով (2009թ.), ԱՊՀ միջխորհրդարանական վեհաժողովի պատվոգրով եւ հուշամեդալով (2011թ.), Երեւանի քաղաքապետի ոսկե մեդալով (2013թ.), ՀԱՊԿ խորհրդարանական վեհաժողովի պատվոգրով (2013թ.), «ԵԿՄ 20-ամյակ» հուշամեդալով (2014թ.), «Մխիթար Գոշ» մեդալով (2015թ.), ԱՊՀ ՄԽՎ «Համագործակցություն» շքանշանով (2015թ.):
Գիտական, հրապարակախոսական հոդվածների, «Գարեգին Նժդեհը եւ ռազմական մանկավարժության հիմնահարցերը» մենագրության հեղինակ է։
Ամուսնացած է, ունի երկու զավակ:
Կարդալ նաև՝
