Հիմնադիր խորհրդարանի անդամ Ալեք Ենիգոմշյանը, ըստ Ազատություն ռադիոկայանի, համոզմունք է հայտնել, որ «Հաց բերող»-ի մահը հնարավոր էր կանխել․ իշխանություններն ընդամենը կամք պիտի դրսևորեին, օրենքի պահանջին հետևեին․ «Առողջական պայմանները առանց հաշվի առնելու և կոպտորեն խախտելով և՛ միջազգային, և՛ նույնիսկ հայաստանյան օրենքները և ենթաօրենսդրական կարգը, Արթուրը փաստորեն դատապարտվեց մահվան»:
Ենիգոմշյանի խոսքով՝ Արթուր Սարգսյանից իշխանությունները վրեժ էին լուծում, նաև մյուսներին ցույց տալիս, որ այդ տեսակը չի հանդուրժվելու․ – «Պատժել մարդկանց, ովքեր համարձակվում են ընդվզել այս տիրող անընդունելի համակարգի դեմ, որպեսզի նրանց ազնիվ պայքարի օրինակը արձագանքներ չունենա ժողովրդի մեջ: Այսինքն, մնացած մարդիկ վախենան՝ տեսնելով, թե ինչ է պատահում պայքարողի հետ, նույնիսկ նման պայմաններում գտնվող պայքարողի հետ»։
Հիմնադիր խորհրդարանը դիմել է Պաշտպանության նախարար Վիգեն Սարգսյանին, որպեսզի Արթուր Սարգսյանը հուղարկավորվի «Եռաբլուր» զինվորական պանթեոնում՝ որպես ղարաբաղյան պատերազմի մասնակից:
