Հայկական ուսումնասիրությունների ԱՆԻ կենտրոնը երեքշաբթի օրը՝ փետրվարի 14-ին, ժամը 13-ին, Երևանի «Արթբրիջ» սրճարան-գրախանութում (Աբովյան, 20) կներկայացնի Հայաստանի Առաջին Հանրապետության առաջին վարչապետ Հովհաննես Քաջազնունու «Ազգ և Հայրենիք» աշխատության վերահրատարակված հատորը:
Փետրվարի 14-ը Քաջազնունու ծննդյան օրն է: 1868-ի այդ օրը նա ծնվել է Ախալքալաքում:
Հայ քաղաքական ու փիլիսոփայական մտքի պատմության այս բացառիկ աշխատությունը առաջին անգամ հատվածաբար տպագրվել է ՀՅԴ «Հայրենիք» (Բոստոն) ամսագրում՝ 1923-1924 թվականներին:
Թեև այն մի քանի անգամ վերահրատարակվել է Սփյուռքում և Հայաստանում, այդ թվում՝ 2008-ին Երևանում, Քաջազնունու «Ազգ և Հայրենիք»-ը շարունակվում է մնալ պահանջված գրքերի ցանկում։
ԱՆԻ կենտրոնի կողմից վերահրատարակվելուց հետո «Ազգ և Հայրենիք»-ի առաջին շնորհանդեսը կայացել է Անթիլիասում՝ 2016թ. հոկտեմբերի 28-ին՝ Հայ գրքի 37-րդ տոնավաճառում, և 2016թ. նոյեմբերի 1-ին Բեյրութի Հայկազյան համալսարանում:
Փետրվարի 14-ին, ժամը 13․00-ից 13․45-ը, Երևանի «Արթբրիջ» սրճարան-գրախանութում կկայանա գրքի երրորդ շնորհանդես-վաճառքը:
«Քաջազնունին հայ քաղաքական մտքի պատմության մեջ բացառիկ տեղ ունի: Եվ որպես պետական-քաղաքական գործիչ, և որպես գրող ու մտածող, ցավոք, Քաջազնունին ըստ արժանվույն գնահատված չէ ո՛չ Սփյուռքում, ո՛չ Հայաստանում: Վերահրատարակելով նրա աշխատությունները, ԱՆԻ կենտրոնը իր համեստ լուման է ներդնում այս խոշոր անհատականությանը ժամանակակիցներին ծանոթացնելու համար»,- ասել է Սիվիլիթաս հիմնադրամի փորձագետ և ԱՆԻ կենտրոնի համակարգող, լրագրող Թաթուլ Հակոբյանը, ով «Արթբրիջ» սրճարան-գրախանութում կներկայացնի «Ազգ և Հայրենիք» հատորը։
Շնորհանդեսի ընթացքում ներկաները հնարավորություն կունենան ձեռք բերել նաև Թաթուլ Հակոբյանի և ԱՆԻ կենտրոնի հեղինակած և հրատարակած շուրջ երկու տասնյակ մյուս գրքերը, այդ թվում՝
Հովհաննես Քաջազնունի – «Հ. Յ.Դաշնակցությունը անելիք չունի այլևս» (արևելահայերեն),
Սիմոն Վրացյան – «Խարխափումներ» (արևելահայերեն),
Արշակ Ջամալյան – «Հ. Քաջազնունին և Հ.Յ. Դաշնակցությունը» (արևելահայերեն),
Ռուբէն Դարբինեան – «Մեր Պատասխանը Յովհաննէս Քաջազնունիի» (արևմտահայերեն),
Վահան Նավասարդյան – «Հ. Յ. Դաշնակցության անելիքը» (արևելահայերեն),
«Հ. Յ. Դաշնակցությունը անելիք ունի՞, թե՞ չունի» (արևելահայերեն),
Եղիշէ Քաջունի – «Զօրավար Անդրանիկ – Հայկական առանձին հարուածող զօրամասը» (արևմտահայերեն),
«Արցախյան օրագիր․ կանաչ ու սև» (արևելահայերեն),
«Արցախեան օրագիր․ կանաչ ու սև» (արևմտահայերեն),
“Карабахский дневник” (ռուսերեն)
“Karabakh Diary” (անգլերեն)
«Հայացք Արարատից․ հայերը և թուրքերը» (արևելահայերեն)։
«Հայացք Արարատից․ հայերը և թուրքերը» (արևմտահայերեն)։
«Armenians and Turks» (անգլերեն)։
