Հայկական ուսումնասիրությունների ԱՆԻ կենտրոնը տպարան է ուղարկել Հայաստանի Առաջին Հանրապետության առաջին վարչապետ Հովհաննես Քաջազնունու և չորս այլ երևելի ՀՅԴ-ական գործիչների միացյալ հատորը:
Նախատեսվում է, որ փետրվարի 1-ին՝ Քաջազնունու ծննդյան օրը, Երևանում տեղի կունենա հատորի շնորհանդեսը և վաճառքը:
Թաթուլ Հակոբյանի խմբագրած և առաջաբանով հատորում ներառված են հետևյալ հինգ գործերը՝
Հովհաննես Քաջազնունի. «Հ. Յ. Դաշնակցությունը անելիք չունի այլևս» (արևելահայերեն, աբեղյանական ուղղագրություն),
Սիմոն Վրացյան, «Խարխափումներ» (արևելահայերեն, աբեղյանական ուղղագրություն),
Արշակ Ջամալյան, «Հ. Քաջազնունին և Հ. Յ. Դաշնակցությունը» (արևելահայերեն, աբեղյանական ուղղագրություն),
Ռուբէն Դարբինեան, «Մեր Պատասխանը Յովհաննէս Քաջազնունիի» (արևմտահայերեն, մեսրոպյան ուղղագրություն),
Վահան Նավասարդյան, «Հ. Յ. Դաշնակցության անելիքը» (արևելահայերեն, աբեղյանական ուղղագրություն):
Միացյալ հատորից բացի, այս հինգ հատորները վերահրատարակվում են նաև առանձին գրքերով, այնպես որ, ցանկացողները դրանք կարող են ձեռք բերել նաև առանձին:
Բացի Ռուբեն Դարբինյանի հատորը, մյուս չորս գրքերի առաջին հրատարակությունը եղել է արևելահայերենով և մեսրոպյան ուղղագրությամբ գրեթե հարյուր տարի առաջ՝ 1923-1924 թվականներին: Այսպիսով, այդ չորս գրքերը աբեղյանական ուղղագրությամբ հրատարակվում են առաջին անգամ:
Ավելին, Ջամալյանի գրությունը լույս է տեսել միայն ՀԱՅՐԵՆԻՔ ամսագրի հաջորդական համարներում և առաջին անգամ լույս է տեսնելու առանձին հատորով:
Այն անհատները կամ կազմակերպությունները, որոնք կցանկանան ֆինանսապես աջակցել միացյալ հատորի կամ հինգ գրքերից որևէ մեկի տպագրական ծախսերին, կարող են գրել հետևյալ հասցեներով՝ aniarcf@gmail.com, info@aniarc.am:
Հայկական ուսումնասիրությունների ԱՆԻ կենտրոն
