Հայկական ուսումնասիրությունների ԱՆԻ կենտրոնը նախապատրաստում է մեկօրյա խորհրդաժողով և Մեծի Տանն Կիլիկիո կաթողիկոս Գարեգին Ա Յովսեփյանի (1943–1952) «Կյանքիս ամենադժբախտ օրը և երջանկությանս րոպեն» հուշագրության վերահրատարակություն՝ նվիրված Հայաստանի Հանրապետության քաղաքներից Կարսի անկման 95-ամյակին, որ լրանում է հոկտեմբերի 30-ին:
Մեկօրյա խորհրդաժողովը կկայանա հոկտեմբերի 30-ին Գյումրիի նորաբաց «Շիրակ» կենտրոնում: Մյուս մանրամասների, այդ թվում՝ Երևանից կամ Հայաստանի ու Արցախի այլ մասերից զեկուցաբերների Գյումրի հասնելու և ետդարձի մասին կտեղեկացնենք հավելյալ:
Նրանք, ովքեր կցանկանան լինել զեկուցաբեր այդ խորհրդաժողովում, ցանկալի է, որ մինչև հոկտեմբերի 15-ը ներկայացնեն իրենց զեկուցման թեման՝ գրելով հետևյալ հասցեներին՝ aniarcf@gmail.com կամ info@aniarc.am: Զեկուցումները կարող են լինել գրավոր կամ բանավոր՝ 20 րոպեի շրջանակներում, միայն հայերեն (արևելահայերեն կամ արևմտահայերեն):
Բոլոր զեկուցաբերները կարող են խորհրդաժողովի օրը ներկայացնել կամ վաճառքի հանել իրենց հեղինակած գրքերը:
Ձեր զեկուցումները կարող են վերաբերել Կարսի և մարզի պատմությանը, քաղաքի ունեցած դերին հայոց պատմության մեջ, ճարտարապետությանը, աշխարհագրությանը, ժողովրդագրությանը, ազգագրությանը, ֆոլկլորին, Եղիշե Չարենցին ու Կարսին, Գեորգի Գյուրջիևին ու Կարսին, քաղաքի ու մարզի անկման պատճառներին, 1945-1946 թվականների Ստալինի “պահանջատիրությանը” և այլ թեմաների, որոնք պատշաճ կերպով ուշադրության չեն արժանացել:
Անհասկանալի, բայց ոչ արդարացված պատճառներով Հայաստանում և Սփյուռքում երբեք չի նշվում և հիշատակվում հոկտեմբերի 30-ը: Կարսի անկումը հայոց պատմության խոշորագույն աղետներից է: 1920-ի հոկտեմբերին քեմալականները Քյազիմ Կարաբեքիր փաշայի գլխավորությումբ գրավեցինք քաղաքն ու բերդը՝ չհանդիպելով ո՛չ հայկական բանակի, ո՛չ ֆիդայական խմբերի և ո՛չ էլ ժողովրդի որևէ դիմադրության: Գերի ընկան հարյուրավոր հայեր, այդ թվում Հայաստանի Հանրապետության բարձրաստիճան զինվորականներ ու նախարարներ:
Մեկօրյա այս խորհրդաժողովը կազմակերպվում է «ժողովրդական հանգանակության» շրջանակներում, և բոլոր անհատներն ու կազմակերպությունները, ովքեր ցանկանում են իրենց համեստ կամ առատաձեռն նպաստը բերել, կարող են դա անել ԱՆԻ կենտրոնի բանկային հաշիվներին փոխանցում կատարելով: Բոլոր անհատների և կազմակերպությունների անունները պատշաճ կերպով հիշատակվելու են ինչպես գիտաժողովի ընթացքում և նյութերում, այնպես էլ՝ ԱՆԻ կենտրոնի կայքում:
ConverseBank-ում ԱՆԻ-ի բանկային հաշիվներն են.
Դրամով՝ 19300 52522110100
Եվրոյով՝ 19300 52522110104
Դոլարով՝ 19300 52522110101
Բոլոր նրանք, ովքեր մտադիր են կատարել հանգանակություն, խնդրվում է այդ մասին ԱՆԻ կենտրոնին տեղեկացնել՝ գրելով հետևյալ էլեկտրոնային հասցեներին՝ aniarcf@gmail.com, info@aniarc.am,t.hakobyan@aniarc.am:
Հայկական ուսումնասիրությունների ԱՆԻ կենտրոն
Լուսանկարում՝ տեսարան Կարսից, 2007թ., հեղինակ՝ Թաթուլ Հակոբյան
«Շիրակ» կենտրոնի մասին ՍիվիլՆեթի պատրաստած տեսանյութը
