Ֆորբսի տվյալներով աշխարհի ամենահարուստ հայը՝ ռուսաստանաբանակ Սամվել Կարապետյանը, ով այս պահի դրությամբ Արցախում ամենամեծ ներդրողն է, ռուսաստանաբնակ մի խումբ այլ բարերարների հետ միասին այցելել է Ստեփանակերտի նախկին Ղարմետաքսկոմբինատի տարածքում գործող արտադրամասեր և ծանոթացել նրանց աշխատանքներին:
Արցախի առաջնորդ Բակո Սահակյանի և վարչապետ Արայիկ Հարությունյանի հետ հանդիպման ընթացքում քննարկվել են Արցախում տարբեր ծրագրերի իրականացման հետ կապված հարցեր: Նախագահ Սահակյանը բարձր է գնահատել Սամվել Կարապետյանի հայրենանվեր գործունեությունը `ընդգծելով, որ նրա աջակցությամբ կյանքի կոչված ծրագրերը ոչ միայն նպաստում են Արցախի ժողովրդի առջև ծառացած հրատապ խնդիրների լուծմանը, այլ նաև հուսալի հիմք են ստեղծում Արցախի սոցիալ-տնտեսական կայուն զարգացման համար, հաղորդում է ԼՂՀ նախագահի պաշտոնական կայքը։
Կարապետյանի ներդրումով կառուցված Արցախում խոշորագույն ծրագիրը Ստեփանակերտի հիվանդանոցն է։
Լուսանկարներում՝ Ստեփանակերտի նորակառույց հիվանդանոցը, որը կրում է բարերարի ծնողների՝ Սարգիս և Ամալյա Կարապետյանների անունը։ Ներքի նկարում՝ ազգային բարերար Սամվել Կարապետյանը՝ հիվանդանոցի բացման ժամանակ։
