Հայոց ցեղասպանութեան 100-ամեակին առիթով` կիրակի, 3 մայիս 2015-ի երեկոյեան ժամը 7:00-ին, Զահլէի «Մոնթէ Ալպերթօ» պանդոկին մէջ տեղի ունեցաւ դոկտ. Նորա Արիսեանի` «Հայոց ցեղասպանութեան 100-ամեակ. 100 արաբական վկայութիւններ» գիրքին ներկայացումը` կազմակերպութեամբ Զահլէի ՀՅԴ «Արամ» կոմիտէին:
Զահլէի ՀՅԴ «Արամ» կոմիտէին անունով արաբերէնով բացման խօսքը արտասանեց Խաժակ Բալուլեան: Ան յիշեց Օսմանեան կայսրութեան կատարած ոճիրները լիբանանցիներուն նկատմամբ` ըսելով, որ Լիբանանի նահատակաց հրապարակի յուշարձանը ներկայ է մեզի յիշեցնելու հոն մահապատիժի ենթարկուած բազմաթիւ լիբանանցի մտաւորականներն ու գրական եւ քաղաքական գործիչները: Ան աւելցուց, որ ներկայ թուրքերը վաւերական ժառանգորդներն են Օսմանեան կայսրութեան եւ անմիջական պատասխանատուները հայոց եւ այլ ժողովուրդներու ցեղասպանութեան: Թուրքիոյ պետութիւնը պէտք է ընդունի Հայոց ցեղասպանութիւնը եւ վերադարձնէ հայկական բոլոր գրաւեալ հողերը, որոնք հայերուն արդար իրաւունքներն են:
Ապա Բալուլեան ներկայացուց դոկտ. Նորա Արիսեանի կեանքն ու գործերը` կեդրոնանալով արաբական երկիրներուն մէջ Հայոց ցեղասպանութեան ճանաչման ի խնդիր անոր տարած աշխատանքներուն վրայ:
Բալուլեան թուեց դոկտ. Արիսեանի հեղինակած բազմաթիւ մենագրութիւններն ու թարգմանութիւնները: Այնուհետեւ ան հրաւիրեց դոկտ. Նորա Արիսեանը, որպէսզի ներկայացնէ իր գիրքը:
Դոկտ. Արիսեան արաբերէնով ըսաւ, թէ ըստ պատմաբաններու, Հայոց ցեղասպանութիւնը ունէր տարբեր պատճառներ, անկա կազմակերպուեցաւ եւ իրագործուեցաւ տարբեր հանգրուաններու մէջ` սկսելով 1915 թուականէն առաջ եւ շարունակուելով անոր յաջորդող տարիներուն:
Ան երախտագիտութեամբ յիշեց արաբական երկիրները, որոնք օգտակար դարձան տեղահան եղած եւ ցեղասպանութենէ ազատած հայերուն:
Դոկտ. Արիսեան ըսաւ, թէ իր կարծիքով Հայոց ցեղասպանութեան նկատմամբ արաբ պատմաբաններուն վկայութիւնները սերտելով կարելի պիտի ըլլայ վերլուծել եւ արժեւորել արաբ ժողովուրդի մտածելակերպին զարգացումը` անցեալէն մինչեւ այսօր:
Դոկտ. Արիսեան նկատել տուաւ, որ այս գիրքին համար ան օգտագործած է տարբեր արաբական ուսումնասիրութիւններ` քաղաքական, պատմաբանական եւ գրական տարբեր աղբիւրներէ: Ան արձանագրած է տարբեր համայնքներու պատկանող պատմաբաններու եւ քաղաքական ու գրական դէմքերու վկայութիւնները Հայոց ցեղասպանութեան մասին:
Դոկտ. Արիսեան իր խօսքի աւարտին ըսաւ, թէ իր փափաքն է, որ այս գիրքը ծառայէ Հայոց ցեղասպանութեան ճանաչման նպատակին եւ զայն կարդացողները անդրադառնան արաբ ժողովուրդի կարեւոր դերակատարութեան եւ անոր ընծայած բարիքներուն:
Ապա Վարանդ Հաճեան տուտուկի վրայ ներկայացուց հայկական ժողովրդային շարք մը եղանակներ:
Զահլէի ՀՅԴ «Արամ» կոմիտէին անունով Պերճ Բալուլեան յուշանուէրով մը պատուեց դոկտ. Արիսեանը:
Ձեռնարկի աւարտին ներկաները ստացան դոկտ. Արիսեանի գիրքէն մակագրուած օրինակներ:
ԱԶԴԱԿ, http://www.aztagdaily.com/archives/238972
